د غور ولايت د عامې روغتيا رييس جمعهگل یعقوبي وايي، د زدهکوونکيو د کورونا ويروس له ۶۳ شکمنو پېښو ازمويلو وروسته ۲۳ يې مثبتې تشخيص شوې دي.
د يادو زدهکوونکيو عمرونه ۱۸ نه تر ۲۵ کلونو پورې ښودل شوي چې اوس مهال قرنطين دي.
یعقوبي وايي، پوهنتون کې د حضوري درسونو له پيله يې څو ځلې نظارت کړی او زدهکوونکيو سره يې روغتيايي سپارښتنې شريکې کړې دي.
د غور پوهنتون سرپرست رييس سیدشېراغا هاشمي وايي،سره له دې زدهکوونکيو روغتيايي سپارښتنې مراعتوي؛ خو بيا هم پر کورونا ويروس اخته شوي دي.
د ياد ولايت د روغتيا برخې مسوولان يو ځل بيا د غور ولايت له اوسېدونکيو غواړي چې روغتيايي سپارښتنې رعايت کړي، ترڅو پر کورونا ويروس اخته نهشي.
د دوی په وينا، د کورونا ويروس له خپرېدو تر اوسه پورې په دې ولايت کې ۵۲۸ کسان پر کورونا اخته شوي چې له دې ډلې ۱۱ يې مړه شوي دي.
د يادولو ده چې په هېواد کې د کورونا ويروس د مثبتو پېښو شمېر ۳۸۶۴۱ ته رسېدلی دی.
