د کندهار پخوانی امنیې قومندان جنرال عبدالرازق جسد نن (جمعه) د یاد ولایت خرقې شریفې په څنګ کې خاورو ته وسپارل شو.
د نوموړي د جنازې مراسمو ته د سهیلي حوزې په کچه یوشمېر لوړپوړي نظامي او ملکي کسان راغلي وو.
د سرحدونو او قبایلوچارو وزیر ګلاغا شېرزي په یادو مراسمو کې وویل، جنرال عبدالرازق د هېواد په کچه یو زړور او هېوادپال جنرال و چې هېڅ افغان به یې خدمتونه هېر نهکړي.
په همدې حال کې د کندهار د والي مرستیال حاجياغا لالی دستګیري د جنرال رازق وژل نه هېرېدونکې پېښه یاده کړه او د نوموړي ژوند یې د افغانانو لهپاره لوی غنیمت وباله.
د جنرال عبدالرازق تابوت د هېواد په ملي بیرغ پېچلی و او په پوره رسمي نظم او شان سره لېږدول کېده.
د کندهار ښار ډېری سړکونه هم د ټرافیکو پرمخ تړلي؛ ملي پولیس، ملي اردو او د ملي امنیت سرتېري د ښار امنیت نیولی دی.
د کندهار ولایتي شورا رییس سیدجان خاکرېزوال جنرال عبدالرازق د هېواد په کچه یو غښتلی او زړور سرتېری وباله او زیاته یې کړه چې تر ډېره به د ده په څېر زړور انسان په کندهار کې پیدا نهشي.
بلخوا یوشمېر نورو دیني عالمانو، قومي مشرانو او ځوانانو هم د جنرال عبدالرازق د ژوند بېلابېلو اړخونو په اړه خبرې وکړې او هغه یې د افغانستان یو رښتینی بچی یاد کړ چې په وینا یې د همدې خاورې لهپاره یې ځان قربان کړ.
د کندهار په ګډون د هېواد ګڼ شمېر اوسېدونکي هم د جنرال رازق وژل کېدو خواشیني کړي او د نوموړي وژل د افغانستان لهپاره ستره ضایعه بولي.
تېره ورځ تر غرمې وروسته د کندهار ولایت مقام په انګړ کې د ناڅرګندو کسانو له لوري وسلهواله نښته وشوه چې په پایله کې یې د کندهار امنیې قومندان جنرال عبدالرازق او د یاد ولایت ملي امنیت رییس جنرال عبدالمومن حسینخېل ووژل شول او د کندهار د والي په ګډون یوشمېر نور لوړپوړي چارواکي ټپیان شول.
