نن جمعه ماسپښین شاوخوا ۲ بجې د تالقان ښار د لرګیو پلورلو له سیمي اور لګېدلی او په همدې مسیر تر اوسه ۸ سوداګریز مارکېټونه او سرایونه سوځېدلي دي.
د پېښې عیني شاهدان وايي، چې لومړی له ښاره شاوخوا ۱۰۰ متره وړاندې په یو حمام کې لګېدلی و، چې اوس د تالقان ښار مزکز نږدې سیمو ته رسېدلی دی.
د دوی پر وینا، اور په تېزۍ سره په خپرېدو دی، چې اوسمهال د لرګیو سرای، د لیلامۍ او پنبې پلورلو مارکېټونو ته رارسېدلی او اور يې اخیستی دی.
د قدرت الله ولدي په نامه یو سوداګر وايي، چې د اورلګېدنې په ځای کې یې د شاوخواو یو نیم میلیون ډالرو سوداګریز توکي پراته دي؛ خو تر دامهاله خبر نهدی، چې سوځېدلي او که خوندي پاتې دي.
دمګړۍ اور د ښار په خوا په شدت سره روان دی.
تر دامهاله د اورلګېدنې د اوښتو ځاني او مالي زیانونو په اړه دقیق معلومات نهشته.
د تخار ولایت چارواکیو تر دامهاله څه نهدي ویلي، چې له مرکز او نورو ولایتونو نه یې هم د دې اور د مخنیوي لهپاره مرسته غوښتې او کهنه.
د سیمي خلک وايي، چې د تالقان ښار اطفايي د اور د زیاتېدو مخنیوی کوي؛ خو د هغوی د وسایلو کمښت او د اور شدت ته په کتو سره داسې ښکاري، چې د اور مخه به ونه نیول شي.
