د هېواد په شمال کې د حکومت د وسله والو مخالفانو د فعالیتونو له زیاتوالي سره خبریالان او رسنۍ له ګواښ سره مخ دي او د کارونو د محدېدلو هڅې یې کېږي.
په تازه کې د تخار ولایت د عالمانو شورا رییس عبدالصمد رسنیو ته ګوتڅنډنه کړې ده، چې د فرخندې په سرنوشت به اخته شي.
د تخار د عالمانو شورا رییس د سیمه ییزو چارواکیو او د رسنیو له کارکوونکیو سره په خبرو کې ویلي، چې علما ناراضه دي او رسني داسې خپرونې کوي، چې د خلکو احساسات راپاروي. نوموړی وایي، په دا ډول خپرونو سره د خلکو ارواوې ناکراره دي.
مولوي عبدالصمد وایي، رسنۍ دې د مذهبي لارښوونو سره سم نشرات وکړي.
د نی دفتر مشر صدیق الله توحیدي سلام وطندار ته وویل، که رسنۍ د افغانستان د اساسي قانون سره سم نشرات لري؛ نو رسنیو ته به هېڅ ډول ستونزه جوړه نه شي.
توحیدي وایي، هغه څوک چې د رسنیو د سبوتاژ فکر لري؛ په دې باید پوه شي، چې هېڅوک د رسنیو د بندولو توان نه لري.
توحیدي د تخار ولایت په محلي چارواکیو نیوکه کوي، چې داسي خلکو ته اجازه ور نه ورکړي، چې د رسنیو او د بیان د ازادۍ پر خلاف سنګر جوړ کړي.
د تخار د والي ویاند سنت تیموري سلام وطندار ته وویل، چې د دې ولایت سیمه ییز حکومت د رسینو او خبریالانو د خوندیتوب له پاره له هرې ممکنه لارې کار اخلي او هېچا ته اجازه نه ورکوي، چې د رسنیو او خبریالانو پر وړاندې سنګرونه ونیسي.
تیموري وایي، په تخار ولایت کې رسني مبتذل نشرات لري او د د دې ولایت عالمان یې دې ستونزې ته متوجې کړي دي.
له بلې خوا په تخار کې د ښځو د حقونو فعاله سیلۍ غفار وايي، چې د فرخندې قتل د تاریخ یوه بده پېښه وه، چې د تل له پاره به په ذهنونو کې پاتې وي. د سیلۍ غفار پر وینا، د دې ډول پېښې د ویاړ په توګه یادول انسان او انسانیت ته ستر توهین دی. فرخنده تېر کال د سلواغې په میاشت کې د قهرېدلو اشخاصو له خوا په کابل کې ووژل شوه او بیا یې جسد ته اور واچول شو.
