د سولې لپاره د امریکا د بهرنیو چارو وزارت ځانګړی استازی زلمی خلیلزاد وايي چې د سولې بینالافغاني خبرواترو د پیل ځنډولو لپاره هېڅ ډول موجه دلیل نشته او باید ژرترژره پیل شي.
نوموړي په یوه ټویټ کې د تېرې ورځې برید ته په اشارې چې د پوهنې وزارت د علمي شورا سرپرست عبدالباقي امین پهکې ووژل شو لیکلي، دغه برید هغو کسانو کړی چې د سولې پروسې د تخریب په لټه کې دي.
هغه د یاد برید د غندنې ترڅنګ، هغه خواشینوونکی بللی او ټینګار یې کړی چې ټول اړخونه باید تاوتریخوالی پرېږدي او د سولې خبرې اترې پیل کړي.
په یوه اوونۍ کې دا دویم ځل دی چې خلیلزاد د سولې بینالافغاني خبرواترو پر ژر پیلېدو ټینګار کوي.
دا په داسې حال کې ده چې افغان دولت تر اوسه د پاتې ۴۰۰ طالب بندیانو له ډلې یوازې ۸۰ هغه خوشې کړي او دا پروسه د ځینو بهرنیو هېوادونو د غبرګون له کبله چې وګړي یې په افغانستان کې وژل شوي، درېدلې ده.
اسټرالیا او فرانسه هغه دوه هېوادونه دي چې له دولت نه یې د هغو طالب بندیانو د نه خوشې کولو غوښتنه کړې چې د دوی وګړي یې وژلي دي.
حکومت بیا د پاتې طالب بندیانو د نه خوشې کولو یو لامل د دې ډلې له بنده د امنیتي ځواکونو نه خوشې کول یاد کړي دي. د ولسمشر ویاند څو ورځې وړاندې وویل چې طالبانو یوشمېر امنیتي ځواکونو چې ورسره دي، نه دي خوشې کړي.
