د طالب ډلې ویاند د ولسمشر د مرستیالانو د څرګندونو پر وړاندې غبرګون ښودلی دی.
ذبېحالله مجاهد په یوه خبرپاڼه کې ویلي چې د افغان دولت مرستیالان له تېرو درې ورځو راهیسې د سولې پروسې او اسلامي امارت پر وړاندې خپلې عقدې سړوي.
د ولسمشر لومړي مرستیال امرالله صالح پرون د سولې نړیوالې ورځې په نمانځغونډه کې د خبرو پر مهال طالبان «بغاوتګران» وبلل.
هغه وویل چې د طالبانو د واکمنۍ پر مهال، زرګونه نجونې د هغوی له خوښې پرته د طالبانو قوماندانانو او نږدې کسانو په نکاح کړې دي.
هغه وویل چې طالب ډله له خپلې واکمنۍ راهیسې د عشر او ذکات په نوم له خلکو باج اخلي.
نوموړي طالبان هغه ډله وبلله چې د نړیوالو پر وړاندې یې د افغانستان «عزت او غرور» کم کړی دی.
د طالب ډلې ویاند د امرالله صالح د څرګندونو په غبرګون کې ویلي چې اسلامي نظام خپل تعریف لري او د حکومت مرستیالان یې له درک نه عاجز دي.
د ولسمشر دویم مرستیال سرور دانش هم دوه ورځې وړاندې د محمدزیو او سدوزیو دوه دورې د طالبانو له اسلامي امارت سره پرتله کړې او زیاته یې کړه چې یادې دورې د روح او محتوا له اړخه سره توپیر نه لري.
د طالب ډلې ویاند په خبرپاڼه کې لیکلي چې د اسلامي امارت د واکمنۍ پر مهال، د شرعي مکلفیت له مخې، اسلامي حکمونه پلي کېدل.
د طالبانو په خبرپاڼه کې لیکل شوي، که څوک د دې ډلې د اسلامي نظام پر وړاندې ودرېږي، «خوار او ذلیل» به شي.
