د افغانانو ترمنځ خبرو اترو لپاره د افغان دولت له خوا د سولې مرکچي پلاوي تر نوملړ اعلانېدو څو ساعته وروسته، طالبانو د دغه پلاوي مخالفت وکړ او ويې ويل چې ياد پلاوی ټولشموله نه دی؛ خو د امریکا دغه پلاوی ټولشمول ګڼي او د دغه پلاوي له اعلانېدو یې هرکلی کړی.
طالبانو د یوې اعلامیې په خپرولو سره وویل چې د افغان دولت له خوا علان شوی ۲۱ کسیز پلاوی له دوی سره د قطر په پلازمېنه دوحه کې د شوي تړون له موادو سره ټکر لري.
د طالبانو اعلامیه زیاتوي چې دغه پلاوی ټولشموله نه دی او هغوی به له داسې پلاوي سره خبرو ته کېني چې د ټولو اړخونو له خوا تایید شوی او استازي یې په کې موجود وي.
خو د امریکا د بهرنیو چارو وزیر مایک پمپیو د څو ټوېټونو په لړ کې محمد اشرغني او عبدالله عبدالله «سیالان» ګڼلي او ویلي یې دي چې دوی باید د یوه ټولشموله دولت د تشکیلولو لپاره هم هڅې وکړي.
د پمپیو د ټوېټونو په یوه برخه کې له افغان مشرانو ستاینه شوې: «زه له افغان سیالانو مننه کوم چې د افغانانو ترمنځ خبرواترو لپاره یې یو ټولشموله پلاوی تشکیل کړ. همدارنګه زه د بندیانو د خوشي کولو او د سولې لپاره د دوی د هڅو ستاینه کوم. زه له تاسو غواړم چې ورته هڅې د یوه پراخ بنسټه او ټولشموله دولت جوړولو لپاره هم وکړئ.»
د پوهنتون استاد اکرام عارفي سلام وطندار سره خبرو کې وايي چې د پلاوي د تشکیل په اړه هوکړه، د امریکا د بهرنیو چارو وزیر د فشارونو او ګامونو پایله ده.
عارفي زیاتوي چې د پمپیو ادبیات څرګندوي چې امریکا له یوه داسې پراخ بنسټه دولته ملاتړ کوي چې په کې عبدالله عبدالله هم رول ولري.
له بلې خوا، په عامه چارو کې د ولسمشر محمد اشرف غني سلاکار وحید عمر له عبدالله عبدالله سره د ګډ دولت د جوړولو په اړه د ارګ پر پخواني دریځ ټینګار کوي او زیاتوي چې د نوي حکومت د تشکیل په اړه کار دوام لري، خو د اساسي قانون خلاف به هېڅ ډول معامله ونه شي.
وحید عمر د طالبانو د اعلامیې په غبرګون کې وویل چې د حکومت له خوا ټولشموله پلاوی جوړ شوی او د دې پلاوي څرنګوالی په طالبانو پورې اړه نه لري.
عمر زیاتوي چې طالبان دې نور بهانې نه لټوي او نه دې د سولې پر وړاندې خنډونه جوړوي.
نوموړي دغه راز وویل چې د پلاوي معرفي کولو په اړه د دولت مسوولیت رفع شو؛ خو دوی هم د طالبانو له خوا د معرفي شوي پلاوي په اړه ملاحظې لري.
د ولسمشر سلاکار پوښتنه کوي چې د طالبانو پلاوی د افغانستان له کومې جغرافیې، کوم قشر او د کومو خلکو استازیتوب کوي؟
