د امریکا بهرنیو چارو وزارت وروستیو کې ویلي، له طالبانو سره د سولې خبرو اترو لهپاره یې ډله جوړه کړې چې طالبانو سره د سولې خبرو د چټکوالي په پار به واشنګټن او کابل کې د امریکا په سفارت کې کار پیل کړي.
خو سیاسي شنونکي د دې ډلې رامنځته کولو په اړه بېلا بېل لیدلوري لري.
د پوهنتون استاد لطیف نظري وايي، سره لهدې چې د خبرو اترو ډله رامنځته کول ستونزې نه هواروي ؛ بلکې د سولې له عالي شورا لهپاره موازې ډله شمېرل کېږي چې د دې شورا کړنې تر سیوري لاندې راولي.
د هغه په وینا، د موازي ډلو رامنځته کول وضعیت لاپسې پېچلی کوي.
ښاغلی نظري هېواد کې د شخړې هواري لهپاره د ټولنیز عدالت په تحقق، د ملي یوالي په رامنځته کولو او قومي درزونو په مخنیوي ټینګار کوي.
ښاغلی نظري ټینګار کوي چې د افغانستان سوله د سیمې له بدلونونو سره تړلې ده.
خو بل سیاسي شنونکی فردوس کاووش وايي، د خبرو اترو ډله رامنځته کول د سویلي اسیا لهپاره د امریکا د کړنلارې یوه برخه ده او د دې ډلې فعالیت د سولې له عالي شورا سره په ټکر کې نهدی.
د ښاغلي کاووش په وینا، امریکا د سولې مېز ته د طالبانو راوستلو لهپاره د سیمې په کچه خپلې ډيپلوماټیکې او پوځي هڅې زیاتې کړېدي.
هاخوا د سولې عالي شورا ویاند سیداحسان طاهري د امریکا له لوري د سولې خبرو اترو ډلې له رامنځته کولو هرکلی کوي او وايي، د دې ډلې رامنځته کول سولې ته په رسېدو کې له هغوی سره مرسته کوي.
د ښاغلي طاهري په وینا، په ورته وخت کې د افغانستان د سولې پروسې مدیریت او حاکمیت افغاني بولي او وايي، سږنۍ خبرې به په مخامخ توګه د طالبانو او افغانانو ترمنځ په بشپړه توګه بینالافغاني وي.
د ولسي جرګې یو شمېر غړي هم د سولې عالي شورا او ځېنو نورو ډلو له پټو او ښکاره فعالیتونو اندېښنه څرګندوي او وايي، دا د خلکو حق دی چې د سولې خبرو له څرنګوالي باخبره شي.
د ولسي جرګې مشر عبدالروف ابراهیمي وايي، هغوی به راتلونکیو ورځو کې طالبانو ته د وړاندیزونو، سولې ته د رسېدو لهپاره پروګرامونو او فعالیتونو او دغه راز څو نورو پوښتنو په اړه د سولې عالي شورا یو چارواکی جرګې ته ور وغواړي.
