درې ورځې وړاندې درېيو امريکايي سناتورانو پاکستان ته سفر وکړل او هلته يې له پاکستاني چارواکو سره د ترهګرۍ او نورو مسلو په اړه خبرې اترې وکړې.
تېره ورځ دوشنبه(جولای ۴ مه) دغه سناتوران بیا افغانستان ته راغلل او له ولسمشر او نورو چارواکو سره پر بېلابېلو مسلو وغږېدل.
په دې اړه د سياسي چارو کارپوهان په دې اند دي، چې څو میاشتې وروسته په امریکا کې ولسمشریزې ټاکنې ترسره کيږي او امریکایان هڅه کوي، چې له هېواد نه بهر کمپاین وکړي.
د دوی پر وینا، د افغانستان او پاکستان ترمنځ د اړیکو خرابوالی د دوی بهرني سیاست ته ښه رنګ نه شي ورکولی، نو له همدې امله د دواړو هېوادونو ترمنځ د ښو اړیکو د ډاډ تر لاسه کولو په موخه دغه سناتوران افغانستان ته راغلي.
د چارو څېړونکی جاوید کوهستاني وايي، چې څه موده وروسته به په امریکا کې ولسمشریزې ټاکنې ترسره شي او امریکایان غواړي، چې د افغانستان، پاکستان او د سیمې وضعیت په خپل کنټرول کې ولري، نو په همدې اړه د دغو دوو هېوادونو ترمنځ ښې اړيکې اړينې دي.
د هغه پر وینا، افغانستان ته د حل لارې لټول، د کابل او اسلام اباد ترمنځ د ستونزو کمول او د سرحدونو کنټرول د دغو سناتورانو د سفر یوه برخه جوړوي.
هغه وايي، چې په نړېوالو افکارو کې له ترهګرۍ سره د مبارزې مسله ګرمه ده او دوی غواړي په دغه برخه کې ښه انځور وړاندې کړي.
دغه راز د چارو شنونکی محمد یونس فکور هم په دې باور دی، پاکستان له امریکا سره د ترهګرې پر ضد د مبارزې په برخه کې، چې کومې ژمنې کړې وې تر اوسه يې عملي کړي نه دي.
همدارنګه د هغه پر وینا، د دې ترڅنګ په سیمه کې امنیتي وضعیت او د افغانستان او پاکستان ترمنځ د اړیکو ترینګلتیا دا ټول د دې لامل شول، چې امریکايي سناتوران کابل او اسلام اباد ته سفرونه وکړي، ترڅو دغه مسله له نږدې وڅېړي.
د چارو څیړونکی محمد اسحق اتمر وايي، چې تورخم د مسلې په اړه پاکستان ډېر شوم پلان درلود.
هغه وايي، د پاکستان پوځ غوښته دا جګړه اوږده کړي او د داعش او طالبانو ترڅنګ دلته یوه بله جګړه هم توده وساتي او دا کار امریکایانو ته د اندېښنې وړ دی.
نوموړي زیاته کړه، چې پاکستانیان د امریکایانو په غوښتنه د تورخم جګړه درولې.
تېره ورځ د جمهوري غوښتونکو سناتورجان مکن په مشرۍ د امریکايي سناتورانو درې کسیز پلاوي په کابل کې له افغان ولسمشر محمد اشرف غني او اجرایوي رییس ډاکټر عبدالله عبدالله سره د لیدنې پر مهال یوځل بیا په دې ټینګار وکړ، چې امریکا به د افغان دولت ترڅنګ ولاړه وي او واشنګټن باید د حقاني شبکې له منځه وړلو ته لومړیتوب ورکړي.
