وروسته له هغې چې د حزب اسلامي مشر هېواد کې د سولې د ټینګښت لهپاره طالبانو ته د ځېنو سیمو سپارلو موضوع ته اشاره وکړه؛ د سولې عالي شورا چارواکیو طالبانو ته د ځېنو سیمو سپارلو موضوع په کلکه رد کړه.
د ګلبدین حکمتیار له څرګندونو وروسته داسې ګنګوسې هم خپرې شوې چې ګواکې له طالبانو سره داسې ژمنې شوي چې هرات او څو نور ولایتونه به دې ډلې ته وسپارل شي.
د سولې عالي شورا د دارالانشاء رییس ډاکترمحمداکرم خپلواک وویل، له طالبانو سره خبرو کې دې ډلې ته د کوم ولایت، ولسوالۍ او یا سیمې سپارل د ملت، حکومت او سولې عالي شورا په اجماع کې نهشته .
دا څرګندونې د سولې عالي شورا او د هېواد دیني عالمانو ترمنځ په کابل کې جوړې شوې غونډه کې وشوې.
غونډې ته ښاغلي خپلواک وویل، د سولې راوستلو په تړاو تر بل هر وخت اوسمهال د ولس او دیني علماوو ترمنځ همغږي ډېره شوې او د سولې هڅې په سمه خوا روانې دي.
د دې ترڅنګ د سولې عالی شورا دارالانشاء رییس ډاکترمحمداکرم خپلواک په راتلونکيو ۱۵ ورځو کې د سولې په اړه د مثبتو بدلونونو خبر ورکوي.
ده وویل، د اندونیزیا له کنفرانس وروسته به هڅې وشي چې د ځطنو اسلامي هېوادونو د علماوو ترمنځ هم د افغان سولې په اړه یو نړۍوال کنفرانس جوړ شي.
د کابل پروسې په دویم کنفرانس کې د تېر پر خلاف افغان ولسمشر له طالبانو سره له مخکیني شرط او قید پرته د سولې خبرو وړاندیز وکړ او ویې ویل، که طالبان د سولې له پروسې سره یوځای شي د «سیاسي ګوند په توګه به په رسمیت وپېژندل شي، د طالبانو پر مشرانو به لګېدلي بندیزونه لېرې شي، اساسي قانون به تعدیل شي، د سولې له پروسې سره یوځای کېدونکیو طالبانو امنیت نیول کېږي.» خو لا هم طالبانو د حکومت د دغو وړاندیزونو په اړه غبرګون نهدی ښودلی.
