د سولې او اعتدال ډلې مشر حنیف اتمر په مزارشریف کې د وروستي وضعیت مسوول بولي او د دغه ولایت د امنیې قوماندان د بدلولو په اړه د حکومت پرېکړه «سیاسي ـ انتخاباتي» یادوي.
نوموړي چې په یوه خبري غونډه کې خبرې کولې وویل، بلخ ته د ځواکونو استول اړین نه وو او په یاد ولایت کې رامنځته شوی وضعیت د دوښمن په ګټه دی. حنیف اتمر وايي، د امنیتي ځواکونو او عطامحمد نور د پلویانو ترمنځ کړکېچ قومي نهدی.
نوموړی زیاتوي چې د یاد کړکېچ د مخنیوي لپاره یې که څه هم هڅې وکړې، خو بېپایلې وې او ان حکومت ادعا وویل چې له قهریه قوې یې ګټه نهده اخیستې، «خو شواهد د دې ادعا خلاف دي».
اتمر له دواړو لوریو غواړي چې د یو بل لپاره تېر شي او نور «ورور له ورور سره و نه نښلي.»
حنیف اتمر له حکومته غواړي چې خپل دریځ بدل او د خبرو اترو له لارې یاد کړکېچ حل کړي او دغه راز له نړیوالې ټولنې هم غواړي چې حکومت پوه کړي امنیتي ځواکونه د خلکو پر وړاندې درېدلو لپاره نه، بلکې د هغوی د دفاع لپاره دي.
د نوموړي په وینا، سولې او عتدال ډلې د لرې کولو لپاره له ډېرې مودې راهیسې هڅې روانې دي او د مزاري پر تلین غونډې برید هم د بلخ له کړکېچ سره تړاو لري.
اتمر ټینګار کوي چې اوسنی حکومت د ازادو او عادلانه ټاکنو کولو وسه نهلري او د جوزا په لومړۍ نېټه یې موده هم پای ته رسېږي.
هغه وايي چې په بلخ کې د کړکېچ د دوام لپاره به ټولې قانوني لارې چارې وکاروي.
مزارشریف نن د ځینو نښتو شاهد و. دا کړکېچ له هغه وروسته پراخ شو چې کورنیو چارو وزارت محمدرقیب مبارز د یاد ولایت د امنیه قوماندان په توګه وټاکه، خو عطامحمد نور او پلویانو یې مخالفت وکړ او ټینګار یې کاوه چې باید د دوی په خوښه وټاکل شي.
د بلخ وضعیت ګڼ غبرګونونه هم راپارولي او د یاد کړکېچ د پای ته رسولو غوښتنه یې کړې او له دواړو لوریو یې غوښتي چې باید د بلخ د اوسېدونکیو خوندیتوب او امنیت ته لومړیتوب ورکړي.
اړوند مطالب:
