.png)
د بغلان د لویې لارې ځېنې معرضان وايي، حکومت ژمنه ورکړې چې غوښتنو ته یې رسېدنه کېږي. دوی غوښتي وو چې د بغلان د ولسي جرګې رایو د بیاشمېرنې لهپاره دې ځانګړې محکمه جوړه شي، د ولسي جرګې نوماند او د بغلان د ولایتي شورا پخوانی مرستیال محبوبالله غفاري دې خوشې شي او د دولتي ځواکونو له لوري پر معترضانو د ډزو کولو موضوع دې وڅېړل شي.
د بغلان د والي ویاند محمود حقمل سلام وطندار ته وايي، د اعتراضکوونکیو او حکومتي پلاوي ترمنځ د هوکړې له مخې نن سهار د کابل ـ شمال لویه لاره پرانېستل شوه.
د دې پلاوي یو غړی محمدجان عزیز وايي چې د دې معترضانو غوښتنو ته به د قانون په چوکاټ کې رسېدنه وشي.
د بغلان د ولایتي شورا پخواني مرستیال محبوبالله غفاري ملاتړي خبرداری ورکوي او وايي، د مرکزي حکومت له لوري د دوی غوښتنو ته پام نهکولو سره به دوی بیا له سره اعتراضونه پيل کړي.
خو د بغلان یو شمېر اوسېدونکي پر محبوبالله غفاري باندې تور پورې کوي چې په قتل، غلا، اختطاف، جنسي تېري او خلکو په ځورولو کې لاس لري او دوی د دې تورونو د څېړنو غوښتونکي دي.
سلام وطندار ته رسېدلي اسناد هم ښيي چې ښاغلی غفاري د محلي حکومت له لوري په قتل، اختطاف او د خلکو په ځورولو تورن دی.
دا اسناد په ډاګه کوي چې په ۲۷۹۰/۱۶۴۵ رسمي شمېره لیک کې د ۱۳۹۶/۶/۴ نېټه د بغلان عسکري محکمې د دې ولایت له امنیې قوماندانۍ نه ښاغلي غفاري له لوري د ترسره شویو «جنایتونو» په اړه معلومات غوښتي او زیاته کړې یې ده چې نور سندونه هم د بغلان ولایت د محکمې ریاست ته ولېږي.
د دې سندونو پر بنسټ، د ښاغلي غفاري او د هغه د امر لاندې کسانو له لوري ترسره شويو «جنایتونو» شمېر ۲۰ ته رسېږي چې ۱۰ پهکې د قتل پېښې، ۲ د اختطاف او جنسي تېري دي، ۵ پېښې د وهلوټکولو، د «سمرقندي» سیمې له اوسېدونکیو سره وسلهواله نښته، د ځمکې غصب او پهخپلسري ډول د یوې مرستندویه موسېسې ۲۷۵۰ بورې وړو وېشل شامل دي.
پهدې سندونو کې راغلي، هغه پلاوی ـ چې په ۱۳۹۶کال کې له مرکزه د لویې څارنوالۍ له لوري د بغلان د ولایتي شورا د پخواني مرستیال د «جنایتونو» د څېړنې لهپاره دې ولایت ته لېږل شویو ـ ځېنو دولتي ادارو او محلي چارواکیو له ښاغلي غفاري له وېرې او یا د هغه نفوذ له امله د هغه د جرمونو په افشا کولو کې حقیقت نهدی ویلی او خود داري یې کړېده.
د بغلان یو اوسېدونکی غزیزالرحمن سخيزاده ادعا کوي چې ښاغلي غفوري یې د کورنی یو غړی وژلی او زیاتوی چې په کابل کې ځېنو کړیو باندې تور پورې کوي چې په بغلان ولایت کې د مذهبي او قومي اختلافاتو ته لمن وهي او وايي چې دا کړۍ له ښاغلي غفاري نه د دفاع هڅه کوي.
سره لهدې چې د محبوبالله غفاري د ملاتړیو او حکومتي پلاوي ترمنځ د هغه د راخوشې کولو په اړه بېقید او شرطه هوکړه شوې؛ خو د بغلان د خوست و فرنګ او ګذرګاه نور ولسوالیو اوسېدونکي وايي چې ښاغلی غفاري د دې ولایت په ډېرو جنایتونو کې لاس لري د هغه د مجازات غوښتونکي دي.
د ویلو ده چې د کابل ـ شمال لویه لاره د بغلان ولایت د ولسي جرګې د وروستیو پایلو له اعلان او د محبوبالله غفاري د بندي کېدلو نه وروسته شاوخوا د یوې اوونۍ لهپاره د مسافرو پر مخ تړل شوېوه.
په همدې اړه:
