پر ټاکنو د څار بنسټونه وايي، د مثنی پېژندپاڼو وېش د پېژندپاڼې له کاپي سره هېڅ توپیر نهلري او په ټاکنو کې د سرغړونو لامل کېږي. په وینا یې، تر هغو پورې چې کمېسیون او حکومت شته ستونزې په بنسټیزه توګه حل نهکړي او د څار مناسب سیستم ونه کاروي د سرغړونو زمینې به پر ځای پاتې وي.
هېوادوالو لومړی په کاغذي پېژندپاڼو کې د رایهورکولو ستېکر یا نښان لګولو نه اندېښنه درلوده، خو د ټاکنو کمېسیون څه موده مخکې د ولسمشرۍ ماڼۍ په همغږۍ اعلان وکړ چې له دې وروسته به د پېژندپاڼو په کاپي هم د ټاکنو نښان یا سټیکر ولګول شي؛ دغه مسله بیا د اجرایوي ریاست او سیاسي ګوندونو له غبرګون سره مخ شوه. له هغې وروسته د ټاکنو کمېسیون پرېکړه وکړه چې د امنیتي اندېښنو له منځه وړلو لهپاره په شرایطو برابرو کسانو ته مثنی پېژندپاڼې وېشي او د رایهورکولو سټېکر به هم په کې ولګول شي.
د ټاکنو کمیسیون وايي، دغه پرېکړه یې ناامنه سیمو کې د افغانانو ځاني خوندیتوب لهپاره نیولې ده.
د افغانستان د ټاکنو څار بنسټ موسېسې مرستیال محمود مل وايي، د حکومت او کمېسیون دغسې طرحې یوازې پلمې دي او اصلي ستونزه خپله حکومت او د ټاکنو کمېسیون کې ده. پر ټاکنو د څار بنسټونه بیا وايي، دغه پرېکړه په سیاسي انګېزې او د درغلیو په موخه نیول شوې ده.
ورته وخت کې د نفوسو د احوالو ثبت ادارې ویاند روح الله احمدزی وايي، د رایهورکولو په شرایطو برابر کسانو لهپاره د مثنی پېژندپاڼو وېش د ټاکنو کمېسیون له لوري وړاندې شوې طرحه ده او د هغوی دنده یوازې د پېژندپاڼو وېش دی چې د ټاکنو رڼښت په هغوی پورې هېڅ تړاو نهلري.
هڅه مو وکړه د دې موضوع په اړه د ټاکنو کمېسیون نظر هم ترلاسه کړو خو په ډېرو هڅو سربېره خبرو ته حاضر نشول.
