د غور یوشمېر مدني فعالان د سړکونو او واټونو خرابوالي له امله نیوکه کوي. دوی وايي، د مرکزي حکومت نه پاملرنه سبب شوې چې په تېرو ۷ کلونو کې د غور ولایت یو سړک او واټ هم قیر نهشي.
د غور په مرکز فېروزکوه ښار کې شاوخوا ۷ کاله وړاندې د ولایتي بیارغونې ټیم یا پي ار ټي او ځېنو بهرنیو سفارتونو د ۸ میلیونو ډالرو په لګښت ۱۲ کیلومتره سړک قیر کړی دی. د مدني فعالانو په وینا، وروسته له دې تراوسه ان یو سانتي متر سړک هم دغه ولایت کې نه دی قیر شوی.
د غور ولایت دوو مدني فعالانو یارمحمد یار او غلام رسول مبین سلام وطندار ته وویل، په دې ولایت کې حکومت تراوسه پورې هېڅ داسې پروژه نه ده عملي کړې چې د خلکو قناعت یې ترلاسه کړی وي.
دوی وايي، هغه سړکونه او واټونه چې د ولایتي ادارې بیارغونې ټیمونو لهخوا پاخه شوي وو؛ بېرته ویجاړ شوي او بیارغونې ته اړتیا لري.
دغور مدني فعالان له سیمهییزې ادارې په ځانګړې توګه له ښاروالۍ غواړي چې د فېروزکوه ښار سړک قیر او جغل اچونې مسلې ته پام وکړي.
د غور مرکز فېروزکوه ښاروال محمدعارف قاضي زاده وايي چې دوی د امنیت او تخنیکي وسایلو نهشتوالي لهامله ونه توانېدل چې ویجاړ شوي سړکونه بیرته ورغوي. د غور ښاروال وايي، ډېر ژر به د سړکونو او واټونو ځېنې ویجاړې شوې برخې ورغوي.
د غور د والي ویاند عبدالحی خطیبي هم په دغه ولایت کې د پراختیايي پروژو تطبیق کم بولي او وايي سره له دې چې د دغه ولایت اوسېدونکیو د مرکزي لویې لارې او برېښنا بند جوړېدو لهپاره پراخ اعتراضونه کړي دي خو دغو اعتراضونو تراوسه پورې کومه پایله نه درلوده.
دغه نیوکې داسې مهال کېږي چې د غور سیمهییزو مسوولانو او مدني فعلانو په وینا، د دغه ولایت زیاتره سړکونه په ځانګړې توګه د منډوي سړک د ورښت پرمهال له اوبو ډکیږي چې په تګ را تګ کې د ستونزو ترڅنګ د هټیوالو مالونه هم خرابوي.
