د کابل د امنیې قومانداني په نظارتخونه کې تورنو کسانو ته د لومړي ځل لپاره کتابتون جوړ شو.
د دغې نظارتخونې مسوول ګلاغا قانع وايي، په یاده نظارتخونه کې ۳۰۰ تورن کسان دي او په وینا یې، د هېواد په کچه لومړنۍ هغه ده چې کتابتون پهکې جوړ شو.
د نوموړي په وینا، په یاد کتابتون کې ۵۰۰ ټولنیز، فرهنګي، دیني او د ذهني معلوماتو کتابونه شته.
په همدې حال کې د کابل د امنیې قومانداني د نظارتخونې تورن کسان د یاد کتابتون د جوړېدو په اړه خوښي ښيي او وايي، د دغه کتابتون له جوړېدو مخکې یې ټول وخت بېځایه تېرېده او په نظارتخونه کې یې هېڅ بوختیا نه لرله.
کورنیو چارو وزارت له دې مخکې اعلان کړی و چې د بندیانو ترمنځ د کتاب لوستلو فرهنګ د دودولو لپاره یې داسې طرحه جوړه کړې چې پر بنسټ یې، که هر بندي یو سل مخیز کتاب ولوست او د محتوا په اړه یې ۱۰ دقیقې خبرې وکړې، د بند په موده کې به یې ۶ ورځې کموالی راشي.
