د ننګرهار په روداتو کې ۵۰ بستریز روغتون جوړېږي

چارواکي وايي، په دغه روغتون کې به د روداتو ولسوالۍ سربېره د چپرهار او هسکې مېنې ولسوالیو ناروغانو درملنه هم کیږي.

دغه پنځوس بستریز روغتون د روداتو ولسوالۍ اړوند په پېوې کنډو سیمه کې جوړېږي، چې د چپرهار، رودات او هسکې مېنې ولسوالیو منځنۍ سیمه ده.

ددغه روغتون د بنسټ ډبره نن پنجشنبه (ډسمبر۱) د یو لړ مراسمو په ترڅ کې کیښودل شوه.

 مراسمو ته ننګرهار والي ګلاب منګل وویل یاد روغتون پر لس جریبه ځمکه د یو نیم کال په موده کې جوړېږي، چې پر ټولو اړینو وسایلو به سمبال وي.

هغه وویل، لګښت یې ۴۴ میلیونه افغانۍ دي، چې د عامې روغتیا وزارت له پرمختیايي بودیجې  ورکول کېږي.

ځايي خلکو هم د دغه روغتون پر جوړېدو خوښي و ښوده خو اندېښنه یې دا وه، چې د ډېرو نورو په څېر دا پروژو هم نیمګړې پاتې نه شي.

اوس مهال ننګرهار کې د جلال اباد حوزوي روغتون په ګډون  ۱۲۸ روغتیايي مرکزونه شته، چې چارواکي په نږدې راتلونکي کې د څو نویو روغتیايي مرکزونو جوړېدو خبره هم کوي.