د اوبو او برېښنا وزارت مسوولانو نن د یوې خبري غونډې پر مهال چې د کلیو پراختیا او بیارغونۍ مسوولانو، طبیعي پېښو ته د رسېدو په چارو کې د دولت وزیر او د نړېوال بانک استازیو پهکې ګډون درلود، د هېواد د بندونو ساتلو، طرحه کولو او د مصونیت لارښود جوړولو خبر ورکړ.
د اوبو او برېښنا وزارت مرستیال محمدخان تکل وايي، یاد لارښود یې د ټولو بندونو د ساتلو په موخه د کورنیو او بهرنیو کارپوهانو په همکاري جوړ کړی دی.
د نوموړي په وینا، یادو کارپوهانو هغه ۱۰ بندونه چې ۶۰ کاله وړاندې جوړ شوي وو، هم وارزول او ټولې نیمګړتیاوې یې په ګوته کړې.
په نړېوال بانک کې د اوبو کارپوه میراحمد احمد وايي، یاد لارښود د بندونو د مصونیت پالیسي له مخې چې د دغه بانک لومړیتوب ګڼل کېږي، جوړ شوی دی.
نوموړی زیاتوي، د لارښود جوړولو ترڅنګ، د قرغې او درونټې بندونو د بیارغولو چارې پیل شوي او اوس دوام لري.
بلهخوا د کلیو پراختیا او بیارغونې وزارت مسوولان او طبیعي پېښو ته د رسېدو په چارو کې د دولت وزیر وايي چې د دغه لارښود په عملي کېدو سره به د اوبو بندونه وساتل شي او په هېواد کې د اوبو ضایع کېدو او د بندونو خرابېدو مخه به هم ونیول شي.
د یادونې ده چې د بندونو د ساتنې لارښود د نړېوال بانک په مالي او فني مرسته جوړ شوی دی.
د اوبو او برېښنا وزارت مسوولان وايي، اوس د هېواد په کچه شل کوچني او ستر بندونه جدي مراقبت ته اړتیا لري او په وینا یې، تراوسه یې د قرغې او درونټې بندونو د سروې ترڅنګ، د ماهيپر، سروبي، نغلو، سرحوض، سلطان، دهله او کجکي بندونو سروې بشپړه کړې او د بیارغولو چارې به یې پیل شي.
