د بدخشان د ولایتي شورا غړی محبوبالرحمن طلعت وايي، په ناانډوله توګه د پراخیتايي پروژو تطبیق د دې سبب شوی چې د لېرې پرتو ولسوالیو اوسېدونکي له حکومتي خدمتونو بېبرخې شي.
د ښاغلي طلعت په وینا، زیاتره پراختیايي پروژې مرکز ته نږدې ولسوالیو کې پلي شوېدي او په تېرو ۷ کلونو کې د بدخشان لېریو پرتو ولسوالیو کې یوه پراختیايي پروژه هم نهده پلې شوې.
بدخشان کې مدني فعال سیدعمر باهر هم په ناانډوله توګه د پراختیايي پروژو په تطبیق له نیوکې سره وايي چې د زورواکیو نفوذ د پراختیايي پروژو تطبیق عادلانه بهیر له ستونزو سره مخ کړیدی.
د ښاغلي باهر په وینا، په هغو ولسوالیو کې زیاتره پراختیايي پروژې پلي کېږي چې په حکومت کې وزیر او یا ملي شورا کې استازی ولري.
د ده په خبره، هغه ولسوالۍ چې وکیل یا وزیر لري او یا هم زورواکی پهکې وي؛ هغو کې د نورو ولسوالیو پر ځای ډېرې پروژې پلي کېږي.
د بدخشان د اقتصاد رییس حسیب دقیق سلام وطندار ته وویل چې اقتصاد وزارت، د ماليې وزارت او تدارکاتو کمېسیون په مرسته د پراختیايي پلان کړنلاره جوړه کړې چې پر بنسټ به يې په پراخیتايي پروژو کې انډول په پام کې ونیول شي.
د بدخشان د اقتصاد ریاست مسوولان وايي چې د یادې کړنلاړې پر بنسټ د ولسوالیو او سیمې اړتیاوې تشخیص او د خلکو ستونزو ته لومړیتوبونه ورکول کېږي.
