د افغانستان بانک چارواکي وايي، د کندهار سپين بولک ولسوالۍ له افغانستان بانک له خزانې ۷۶ میلیونه ورکې شوې افغانۍ بېرته د دغه بانک خزانې ته سپارل شوي دي.
دغه پيسې د دغه بانک د پخواني مدیر سید احمد اغا، د هغه ورور او اوخښي له لوري د تېر ۲۰۱۴ زېږدیز کال د فبرورۍ په میاشت کې د بانک له خزانې وړل شوې وې.
سید احمد اغا پرون د (جون په ۲۹مه) سلام وطندار ته وویل، دغه کار يې د دې لپاره کړی و، چې په بانک کې پراخ فساد، رشوت او غلا موجوده وه.
نوموړي زیاته کړه، د پیسو دغه اندازه یې په دې موخه له بانکه وړې وې، چې له ناوړه استعمال نه خوندي وساتل شي.
د نوموړي په خبره، په بانک کې د فساد په اړه یې د مرکزي بانک له مسولینو سره څو ځلې خبرې کړې وې، خو چا یې په خبره عمل نه کولو.
هغه له دولت نه وغوښتل، چې په فساد ککړ کسان دې د قانون منګولو ته راکش کړي او له هغوی سره دې حساب وکړي.
په ورته وخت کې د افغانستان بانک د خزانې مدیر نور محمد د سید احمد اغا څخه مننه وکړه، چې د هېواد پيسې يې بېرته د افغانستان بانک خزانې ته وسپارلې.
د ښاغلي نور محمد په قول، د سید احمد اغا له خوا بانک ته سپارل شوې پيسې د دغه بانک له خزانې نه د وړل شویو پیسو ټول رقم پوره سپارل شوی دی.
له بل لوري د کندهار امنیه قومندانۍ د جنايي جرمونو پر وړاندې د مبارزې رییس مل پاسوال محمد رحیم علي خېل دغه کړنه په نیک فال نیسي او زیاتوي، هغه کسان چې په فساد ککړ دي له هغوی سره به قانوني چلند وشي.
د یادوني وړده، چې پخوا د يادو پيسو د تښتولو پر تور د افغانستان بانک يو شمېر کارکوونکي نیول شوي او زندان ته اچول شوي وو.
خو د کندهار د امنيې قومندانۍ د جنايي جرمونو پر وړاندې د مبارزې مشر علي خېل وایې، له څېړنو وروسته به بې ګناه کسان خوشې شي.
میاشت وړاندې داسې راپورنه خپاره شوي وو، چې دغه پيسې د بانک د کارکوونکیو له خوا غلا شوې وې، خو څه موده وروسته د سید احمد اغا له خوا مرکزی بانک ته وویل شول، چې ده دغه اندازه پيسې په بانک کې د موجود فساد له امله یو خوندي ځای ته وړې دي.
