په دولت کې د بېړنیو حالاتو وزیر او له پېښو سره د مبارزې عمومي رییس ویس احمد برمک وايي، چې د روان کال ژمي له پاره یې ځانګړي تدابیر نیولي دي او زیاتوي، چې ښايي سږکال ژمی به شاوخوا یو میلیون خلک د سخت ژمي له امله د ګواښ سره مخ شي.
برمک وویل، د ژمي موسم په را رسېدو او احتمالي پېښو له پاره یې ۱۶ زره ۷۶۶ ټنه غنم د هېواد ۷ زونو ته لېږلي دي، چې ۲۲ زره ټنه یې د خوراکي سازمان او پاتې نور یې د ملګرو ملتونو له خوا و ویشل شي.
نوموړي نننۍ (سه شنبې، د ډېسمبر په ۲۲مه) د مشرانو جرګې په غونډه کې وویل، چې دوی د ۵۰ زره ټنه د سوند توکو ذخیره لري.
ده زیاته کړه، چې د اړتیا پر وخت به نړیوالو مرستندویو له خوا به ۹ زره ۵۸۰ اړمنو کورنیو سره مرستې وشي.
د بېړنیو پېښو سره د مبارزې وزیر ویس احمد برمک د ژمي په را رسېدو سره د دغې ادارې د تابیاوو راپور مشرانو جرګې ته وړاندې کړ او ویې ویل، چې دوی د ۱۰۰ میلیونه افغانۍ بودیجه لري او زیاته یې کړه، د عامې روغتیا وزارت ورسره ژمنه کړې، چې د اړتیا په وخت کې به ۷ لکه تنو ته روغتیايي خدمتونه ورسوي.
د دې ادارې مشر وویل، د کورنیو چارو او ملي دفاع وزارتونو ډاډ ورکړی، چې د اړتیا پر مهال به هلیکوپترونو مرسته ور سره وکړي.
نوموړي د مشرانو جرګې په تالار کې دا هم وویل، چې د زلزله ځپلو سره د مرسته شویو ۵۰ میلیونه افغانیو له شمېر نه ۴۵ میلیونه پیسې پاتې دي، چې دا به هم د اړتیا په صورت کې مصرف کړي.
ویس احمد برمک د ټولګټو وزارت د مرستې خبره هم وکړه، چې دغه وزارت د ژمي په فصل کې په ټول هېواد کې د ۳۱۸ مهمو سړکونو او لویو لارو د پرانیستلو ژمنه کړې ده.
