د افغانستان د ازادو رسنیو د ملاتړ بنسټ (نی) مسولین وايي، چې دولت د "محرومیت حق" په بهانه له خلکو د "پوهاوي حق" اخیستی دی.
د دغه بنسټ مسولینو تېره ورځ د (سپټمبر په ۲۸مه) د "پوهاوي حق" د نړیوالې ورځې د نمانځې په لړ کې اطلاعاتو ته د لاس رسي په برخه کې د حکومت پر چلند نیوکې وکړې.
دوی وویل، چې اطلاعاتو ته د لاس رسي قوانینو له پلي کېدلو کال تېرېږي، خو لا هم حکومتي مسولین په ډېرو برخو کې خبریالانو ته اطلاعات نه ورکوي.
د نی اجرایوي رییس عبدالمجیب خلوتګر په جوړې شوې غوڼده کې وویل، د نوي نظام له رامنځته کېدلو وروسته اطلاعاتو ته د لاس رسي په برخه کې پرمختګ شوی، خو وايي، چې دغه لاسته راوړنې بسنه نه کوي.
نوموړي وویل، چې د اطلاعاتو په برخه کې افغانان او په ځانګړي توګه خبریالان له ستونزو سره مخ دي.
خلوتګر زیاته کړه، حکومتي چارواکي په دې نه پوهېږي، چې اطلاعاتو ته لاس رسي د افغانانو قانوني حق دی، خو دوی له دې سره – سره بیا هم نه غواړي، چې له رسنیو سره اطلاعات شریک کړي.
نوموړي وویل، حکومتي مسولین د محرومیت په بهانه له خلکو سره د اطلاعاتو له شریکولو ډډه کوي.
خلوتګر همداراز وویل، چې ډېر افغانان او په ځانګړي توګه دولتي مسولین په دې نه پوهېږي، چې اطلاعاتو ته لاس رسی؛ د قانون له مخې د دوی حق دی.
د نی اجرایوي رییس ټینګار وکړ، د ملي یووالي حکومت له جوړېدو څخه یو کال کیږي او لا هم خبریالانو او هېوادوالو اطلاعاتو ته د لاس رسي په برخه کې له ستونزو سره مخ دي.
د دغه بنسټ مسولین ادعا کوي، چې حکومت د امنیتي پېښو پورې تړلو برخو کې له رسنیو سره اطلاعات نه شریکوي او دغه چاره د دې لامل شوې ده، چې خبریالان خپله سانسور ته اړ شي.
له بل لوري یو شمېر خبریالان وايي، چې اطلاعاتو ته د لاس رسي قانون د حکومتي مسولینو له لوري نه دی پلی شوی او زیاتوي، چې په ډېرو برخو د دولتي سرچینو اطلاعاتو ته اړتیا وي، خو ویاندویان ځواب نه وايي.
دا لومړی ځل دی، چې په افغانستان کې د پوهانوي حق نړیواله ورځ (۲۸ سپټمبر) نمانځل کېږي.
