.jpg)
د ولسمشر دویم مرستیال سرور دانش نن «په افغانستان کې د سولې خنډونه او حل لارې» په نوم جوړه شوې غونډه کې وویل، افغان حکومت د سولې په اړه ګډ نظر لري او هېڅکله یې له کمزوري دریځ نه په سوال نه غواړي.
د نوموړي په وینا، حکومت له طالبانو سره په جګړه کې ماتې نهده خوړلې؛ نو ځکه د سولې لپاره سر چا ته سر نه ټیټوي. دانش طالبانو ته په خطاب کې وايي، یاده ډله جګړه غوښتونکې ده او افغانان وژني چې باید د دغو وژنو او ملي بنسټونو د ورانولو ځواب ورکړي او هېڅکله مجاهده ډله نه بلل کېږي.
سرور دانش وايي، د طالبانو پر وړاندې د حکومت جګړه، روا دفاع ده، خو د خپلو خلکو د دفاع لپاره د سولې لار غوره کوي.
دانش د طالبانو د امارت دوره یوه ناکامه دوره یادوي چې افغانستان یې نړۍ ته د ترهګرو مرکز معرفي کړ، د خلکو یووالی یې له منځه یووړ او د هېواد کلتور او تاریخ یې تالا کړ.
د ولسمشر دویم مرستیال وايي، د افغانستان اساسي قانون د اسلام له دین سره سم جوړ شوی او حکومت هم د خلکو استازولي کوي. نوموړي په افغانستان کې د داعش ډلې را پیدا کېدو اصلي لامل وباله او زیاته یې کړه چې اسلام د همدې ډلې له لوري خلکو ته ناسم وړاندې شو.
دانش ټینګار کوي چې طالبان باید له مخکنیو شرطونو تېر شي، له جګړې لاس واخلي او اوربند وکړي چې د سولې خبرو اترو ته لار هواره شي. د نوموړي په وینا، له لومړنیو پړاوونو وروسته کېدای شي چې په سیاسي ګډون او واک کې د ونډې پر سر له هغوی سره خبرې اترې وشي.
سرور دانش د سولې خبرو اترو اصلي اړخ افغان حکومت بولي او وايي، له حکومت پرته هر ډول خبرې اترې بې پایلې دي. دانش د لنډمهالي حکومت جوړول، تېر ته د ګرځېدو په مانا بولي او ټینګار کوي چې د اوسني نظام یوې خوا ته کول یا له منځه وړل افغانانو ته د منلو نه دي.
د ولسمشر دویم مرستیال د حکومت مخالفو سیاسي ډلو ته په خطاب کې وايي، له حکومت سره د مخالفت له کبله باید د نظام پر وړاندې و نه درېږي. نوموړی د ټاکنو ځنډ د ملي ګټو خلاف بولي او وايي، هغه سوله چې له دې لارې راشي، تلپاتې نه ده.
سرور دانش د سولې په برخه کې د امریکا متحده ایالاتو، په ځانګړي ډول د افغان سولې لپاره د امریکا د بهرنیو چارو وزارت د ځانګړي استازي زلمي خلیلزاد د هڅو هرکلی کوي و نوموړی یو وتلی او ماهر ډېپلوماټ یادوي.
خلیلزاد: تلپاتې او داسې سوله باید وشي چې ټول ارزښتونه په کې خوندي وی
خلیلزاد: د امریکا لهپاره سوله لومړیتوب دی، نه د ځواکونو ویستل
.jpg)
نوموړی د افغانستان سیاسي نظام، اساسي قانون، د تېرو نږدې دوو لسیزو لاستهراوړنې، د بیان ازادي، رسنۍ، اطلاعاتو ته لاسرسی، مدني ټولنې، بشري او د ښځو حقونه د سولې خبرو اترو لپاره د حکومت سرې کرښې بولي او وايي، د تلپاتې سولې لپاره طرحه لري چې د تصویب لپاره به یې ډېر ژر د سولې مشورتي جرګه جوړه شي.
دا په داسې حال کې ده چې ټاکل شوې د افغان سولې لپاره د امریکا د بهرنیو چارو وزارت ځانګړی استازی د فبروري میاشتې په ۲۵مه د پنځم ځل لپاره په قطر کې له طالبانو سره خبرې وکړي. ټاکل شوې وه په دې غونډه کې د طالبانو د سیاسي دفتر رییس ملاعبدالغني برادر هم ګډون وکړي، خو طالبانو نن خبر ورکړ چې نوموړی به یوازې هغه مهال په یاده غونډه کې برخه واخلي چې د امریکا د بهرنیو چارو وزیر هم پهکې ګډون وکړي.
په همدې حال کې رویټرز خبري اژانس د طالبانو د یوه لوړپوړي چارواکي له قوله راپور ورکړی چې ملابرادر د سفر سند نه لرلو او «د طالبانو د مشرانو ترمنځ د ځینو ناحل شویو موضوعاتو» له کبله په یاده غونډه کې ګډون نهشي کولای.
تراوسه د امریکا او طالب استازیو ترمنځ څلور ځله مخامخ خبرې شوي چې وروستۍ غونډې یې شپږ ورځې دوام وکړ او وروسته زلمي خلیلزاد د سولې خبرو اترو پر یوه ټولیز چوکاټ د هوکړې خبر ورکړ.
