د افغان سولې لپاره د امریکا د بهرنیو چارو وزارت ځانګړی استازی زلمی خلیزاد د خپلو سیمهییزو سفرونو په دوام د یکشنبې شپه ناوخته کابل ته راغی.
خلیزاد کابل ته له رارسېدو وروسته له ولسمشر محمداشرف غني، اجرایوي رییس عبدالله عبدالله، عبدالرب رسول سیاف او د حکومت له ځینو نورو پخوانيو او اوسنيو چارواکیو سره لیدلي او د سولې په اړه یې ورسره خبرې کړې دي.
د ولسمشر مرستیال ویاند شاهحسین مرتضوي سلاموطندار ته وویل چې ولسمشر غني تېره شپه له زلمي خلیزاد سره د افغان سولې په اړه لیدلي او د سولې پر روانو هڅو یې خبرې اترې کړې دي.
مرتضوي زیاته کړه، د دواړو لوریو تر منځ خبرې دوام لري او په دغو بحثونو کې د پرمختګ جزیات به له افغانانو سره شريک شي.
د یادونې ده چې د ولسمشر غني او ښاغلي خلیزاد په دې لیدنه کې د ملي امنیت سلاکار حمدالله محب ګډون نه درلود.
د افغان سولې لپاره د امریکا د بهرنیو چارو وزارت ځانګړي استازي پر خپلې ټویټرپاڼې لیکلي چې پهدې لیدنو کې د سولې خبرو په موخه د یوه پراخ بنسټه پلاوي جوړېدو په اړه له سیاسې ګوندونو، د دولت استازیو، ښځو، مدنې فعالانو او ځوانانو سره خبرې اترې وشوې.
زلمي خلیزاد ویلي، له اجرایوي رییس عبدالله عبدالله سره په لیدنه کې یې د بینالافغاني خبرو اترو په اړه د نړیوالې ټولنې د ملاتړ څرنګوالي په اړه خبرې کړې دي.
اړوند مطالب:
خلیلزاد: د بینالافغاني مذاکراتو د پیل لپاره په بیړه کار کوو
خلیلزاد: د افغان سولې بهیر اسانه نهدی
خلیزاد له دغو لیدنو وروسته نن کندهار ته لاړ او د سفر موخه يې هم له قومي مشرانو سره لیدنه ښودل شوې ده.
په همدې حال کې د ولسمشر دویم مرستیال سرور دانش نن د افغانستان لپاره د ملګرو ملتونو د مرستندویه پلاوي د دفتر مسوول تدامیچي یاماماتو سره په لیدنه کې ویلي چې خلک او سیاسې مشران د دولت پر محور د سولې په خبرو کې موافق نظر لري.
دانش پر خپلې فېسبوکپاڼې لیکلي، د سولې په خبرو کې د دولت محور خوندي ساتل شوی او د دغه بهیر مالکیت هم د خلکو په لاس کې دی .
په همدې حال کې د ارګ او سپیدار ویندویان وايي چې په نږدې راتلونکې کې به د سولې مرکچي پلاوي وروستی نوملړ اعلان شي.
