د ډیورنډ کرښې له هغې غاړې د خوست ولایت د علي شېر ولسوالۍ پر سیمو د توپ ۱۵ ګولۍ توغول شوي دي.
د خوست د ځای ناستي والي وياند مبارز محمد ځدراڼ سلام وطندار ته وويل، د توپ ۷ ګولۍ د یادې ولسوالۍ په چرګوټي او ۸ پر ببرک تاڼې سيمه لګيدلې دي.
د ښاغلي ځدراڼ پر وینا د توپ ګولۍ د ببرک تاڼې سيمې درې کورونه نړولي چې له امله یې پنځه ښځې او ماشومان وژل شوي، لس نورې ښځې¸ماشومان او نارینه په کې ټپيان شوي دي.
په خوست کې د کوچيانو يو تن قومي مشر حاجي رمضان کوچی هم وايي، چې تر دې مخکې هم کله ناکله د دوی پر سيمو د کرښې له هغې غاړې توغندي ورول شوي دي، خو کومه مرګ ژوبله يې نه لرله.
له دې وړاندې په ۲۰۱۴ زیږدیز کال کې په کونړ ولایت د ډیورنډ کرښې له هغې غاړې د توپ ډزې کېدلې او لسګونه تنه یې وژلي وو.
د کونړ ځای چارواکو د پاکستاني لوري د بریدونو له امله د لسګونو کورنو د ړنګېدو خبر هم ورکړی و.
هغه مهال افغان چارواکو په پاکستان سختې نیوکې شروع کړې او پر خلاف یې د هیواد په بېلا بېلو ولایتونو کې لاريونه هم وشول.
کونړ ته ورته په پکتیا ولایت هم د ډيورند کرښې له هغې غاړې څخه د توپ ډزې وشوې، چې په ځواب کې یې ولسي خلکو د پاکستان په ملېشو ډزې کړې وې.
په ورستيو کې چې دعوه کيږي، د افغانستان او پاکستان حکومت ترمنځ اړېکې ښه شوي؛ نو دا ډول برېدونه به یو ځل بیا وکولی شي ددواړو لورو ترمنځ لفظي شخړو او د اړېکو خرابېدو ته لاره هواره کړي.
