د اجرايوي ریاست د ویاند مرستيال جاوید فېصل وايي، چې د ټاکنو خپلواک کمېسيون اوسني کمېشنران په دغه کمېسیون کې د اصلاحاتو له راوستو وړاندې نه شي کولی، چې د ولسي جرګې او ولايتي شوراګانو د ټاکنو کره نېټه وټاکي.
نوموړي نن پنجشنبه (سپټمبر۱۷ مه) سلام وطندار سره د مرکې پر مهال زیاته کړه، چې د ټاکنو په هکله هر ډول پريکړه به د نوي کمېشنرانو له ټاکلو وروسته نيول کيږي.
دا په داسې حال کې ده، چې افغان ولسمشر محمد اشرف غني د يو فرمان په ترڅ کې د ټاکنو له خپلواک کمېسیون څخه غوښتي، چې د ولسي جرګې او ولايتي شوراګانو د ټاکنو نېټه دې معلوم کړي.
خو د اجرايوي ریاست د ویاند مرستیال بیا وايي، چې ترڅو د ټاکنو په خپلواک کمېسيونونو کې نوي غړي و نه ټاکل شي، نو د ولسي جرګې او ولايتي شوراګانو د ټاکنو کره نېټه به هم اعلان نه شي.
د جاوید فېصل په وينا، د ټاکنو په کمېسيونونو کې د اصلاحاتو راوستو وړاندې هيڅ وروستۍ پريکړه به د دغه کمېسيون له لوري ونه منل شي.
په همدې حال کې، ولسمشر محمد اشرف غني د ټاکلو د کمېټې فرمان هم صادر کړی او د سترې محکمې له رییس څخه يې غوښتي، چې د دغه بنسټ استازي د ټاکلو کمېټې ته و پېژني.
له بل لوري د " ایوا" یا پر ټاکنو د څار بنسټ مشر د ټېلفوني اړیکې پر مهال سلام وطندار ته وویل، چې اوسمهال د ټاکنو خپلواک کمېسيون وظایف او د صلاحيتونو تشکیل د ولسمشر له لوري د تعدیل په حالت کې قرار لري، نو په همدې وجه اوسني کمېشنران نه شي کولی، چې د ولسي جرګې او ولايتي شوراګانو د ټاکنو تاریخ و ټاکي.
د هغه په خبره، که چېرې اوسني کمېشنران د ټاکنو نېټه معلومه کړي، نو په کمېسيونونو کې د اصلاحاتو راوستل به معنا ونه لري.
سپين غر زیاته کړه، چې نوي کمېشنران باید ټاکنیزو اصلاحاتو کمېسیون سره يوځای کار وکړي.
د کمېشنرانو د ټاکلو کمېټه د ټاکنیزو اصلاحاتو د کمېسيون یو له وړاندیزونو څخه وو، چې د ولسمشر غني له خوا و منل شو.
سره له دې، چې د ولسي جرګې او ولايتي شوراګانو د تاریخ ټاکل د ټاکنو خپلواک کمېسيون یو له صلاحيتونو بلل کيږي، خو هغه څه چې په تېرو ولسمشریزو ټاکنو کې د کمېشنرانو له لوري ترسره شول د دغه کمېسيون اعتبار ته زیان ورسوه او صلاحيتونه يې هم تر سوال لاندې راغلل.
