د کورنيو چارو وزیر نور الحق علومي هغه څرګندونې په کلکه رد کړې، چې ګوندې د افغان امنيتي ځواکونو په ليکو کې دې جاسوسان ځای ولري.
هغه وايي، که چېرې دوی د افغان امنيتي ځواکونو په ليکو کې د جاسوسانو څرک هم و ويني، نو بې له ځنډه به ورسره قانوني چلند وکړي.
همدارنګه نوموړي د کورنیو چارو وزارت او اروپايي اتحادیې ترمنځ د مرستو هوکړه لیک په کنفرانس کې رسنیو ته وویل، چې که پخوا د حکومتي چارواکو له لوري داسې څرګندونې شوي وي، نو دا د هغو په شخصي څرګندونو پورې اړه لري.
علومي په داسې حال کې دا شان څرګندونې کوي، چې د پخواني ولسمشر حامد کرزي او د نوي حکومت په لومړيو کې د افغانستان کورنيو چارو پخوانی وزیر د خپلې دندې د پای څخه يوه ورځ وروسته د لوړ پوړو امنيتي چارواکو په عمومي غونډه کې وویل، چې اوس هم په امنيتي بنسټونو کې د بهرنيو هېوادونو جاسوسان فعال دي او ناامنيو ته لمن وهي.
داودزي هغه مهال نه د هېواد او نه هم په امنيتي ځواکونو کې د جاسوسانو نوم واخیست.
علومي وویل، جاسوس هغه چا ته ویل کیږي، چې ایمان، اراده او د ملي ګټو د ساتلو او دفاع سپېڅلي عظم او موخه ونه ولري، چې په وينا يې افغان ځواکونه له دغو خصوصياتو پاک دي.
د غونډې په پای کې د افغانستان او اروپايي اتحاديې ترمنځ د افغان پولیسو سره د مرستو کولو په برخه کې یو هوکړه لیک لاسلیک شو.
د راپورونو له مخې دغه اتحادیه به د هوکړه ليک پربنسټ د تر ۲۰۱۷ م زېږدیز کاله پورې د پولیسو په مسلکي کولو، له عدلي او قضايي ارګانونو سره د پولیسو مرسته کول، په حسابونو کې د روڼتیا او نورو برخو کې د کورنیو چارو وزارت ملاتړ کوي.
