یو شمېر دیني عالمانو او سیاستوالو نن په کابل کې د یوې غونډې پر مهال په هېواد کې د جګړې پر پای ته رسېدو او د سولې پر راتلو د ټینګار ترڅنګ وویل، افغانستان په حساس وضعیت کې دی او له شته فرصته باید ګته واخیستل شي.
د دوی په وینا، د افغانستان اساسي قانون تر ټولو ښه قانون دی، باید پلی او اوسنی نظام پر خپل ځای پاتې شي.
د غونډې ګډونوالو له طالبانو وغوښتل چې له حکومت سره د سولې خبرو اترو ته حاضر شي، څو په افغانستان کې بیا تېرې تجربې تکرار نه شي.
د سولې عالي شورا د دارالانشا پخواني رییس اکرم خپلواک وویل، د امریکا او طالبانو ترمنځ «افغانستان ته د سولې راوستلو هوکړهلیک» تر لاسلیک وروسته د حکومت او طالبانو ترمنځ تبلیغاتي جګړه پیل شوې ده.
په همدې حال کې د سولې او ازادۍ لپاره د ښځو د نړیوال نهضت غړیو هم نن په کابل کې یوې غونډې ته وویل چې ښځې باید د سولې خبرو اترو کې ونډه ولري.
د یاد بنسټ رییسې جمیلې افغاني وویل، سوله د افغانانو لومړیتوب دی او دوی د سولې له هر ډول خبرو اترو چې د سولې د راتلو لامل شي، ملاتړ کوي.
د دغه بنسټ د یو شمېر غړیو په خبره، په تېرو کلونو کې افغانو ښځو ته پام نه دی شوی او دوی د ټولو افغان ښځو په استازولۍ د سولې د راتلو لپاره خپل غږ پورته کړی دی.
دیني عالمان، سیاستوال او ښځې په داسې حال کې د سولې په تړاو غبرګون ښيي چې د امریکا او طالب ډلې ترمنځ د سولې هوکړهلیک د روانې اوونۍ د شنبې په ورځ د قطر په پلازمېنه دوحه کې لاسلیک شو.
