د سولې عالي شورا مرستیال ویاند اسدالله زایري سلاموطندار ته وویل، د مسکو غونډه د طالبانو د استازیو او له کابل نه د تللي پلاوي ترمنځ ده چې بېلابېلې کمېټې په بېلابېلو برخو کې کار کوي او د کارکوونکیو ترمنځ فضا هم مناسبه ده.
د هغه په وینا، کله چې د کمېټو کار پای ته ورسېږی، د کمېټو د کارونو پایلې به تر جمعبندۍ وروسته رسمي غونډې ته وړاندې شي.
زایري د مسکو په نننۍ غونډه کې د سولې عالي شورا رییس کریم خلیلي ته د ګډون نه اجازې ورکولو ادعا رد کړه او ویې ویل چې نوموړی په غونډه کې دی او کېدای شي په عمومي غونډه کې وینا هم وکړي.
د سولې عالي شورا داسې مهال د مسکو په غونډه کې د دې شورا د رییس ګډون تایید کړی چې تر دې وړاندې په قطر کې د طالبانو د سیاسی دفتر ویاند سهیل شاهین چې د مسکو په غونډه کې هم ګډون لري، پر خپلې ټوېټرپاڼې لیکلي وو چې د مسکو د بینالافغاني تفاهم په غونډه کې د سولې عالي شورا رییس او په مسکو کې افغان سفیر ګډون نهلري.
د طالبانو او یوشمېر افغان سیاستوالو ترمنځ د سولې خبرو په تړاو دویمه غونډه تېره ورځ په مسکو کې د افغانستان لپاره د روسیي د ولسمشر ځانګړي استازي ضمیر کابلوف په مشرۍ جوړه او پهکې د افغانستان او روسیې د سل کلونو ډیپلوماټیکو اړیکو پیل ونمانځل شو، خو نن بیا د طالبانو او افغان پلاوي ترمنځ بینالافغاني غونډه وشوه.
