افغانستان تینچلیگی بوییچه آمریکا خاص نماینده‌سی زلمی خلیلزاد، آمریکا و طالبان آره‌سیده امضالنگن تینچلیک کیلیشووی افغانستان اوچون تاریخی بیر فرصت یره‌تگنی گه اشاره قیلیب ایتیشیچه، آمریکا و بیرلشیک‌لری حقیقت ده دنیا جماعه‌چیلیگی، افغانستان رهبرلریدن مملکت و یشاوچی‌لری نینگ اولویت گه قرار بیریش‌لرینی سوره‌یدی.
جناب خلیلزاد بیر توییت یازیب، طالبان آرقه‌لی زوروانلیک کمه‌یتیریلیشی و آتیش کیسین اعلام ایتیلیشی، مملکت سیاسی بحران‌لری حل ایتیلیشی اوچون افغانستان رهبرلری نینگ توجه‌سی و محبوس‌لر قوییب یوباریلیشی توغریسیده ناتو تامانیدن ترقه‌تیلگن اعلامیه نی خوش قرشی‌لب کوپه‌یتیریشیچه، «سونگی کلیدی اَدیم‌لرگه تمرکز قیلگن و بیرلشیک‌لرنینگ فکری اساسیده افغانستان تینچلیگی اوچون اونملی بولگن ناتو نینگ اعلامیه‌سینی خوش قرشیله‌یمن.»
اونینگ اورغولشیچه، افغانستان آلغه کیتیشی یا-ده آرقه گه قیتیب اوروش، قشاق‌لیک و کسل‌لیک‌که قالیشی، تامان‌لرنینگ نیتی گه تیگیشلی دیر.
افغانستان حکومتی محبوس‌لرنی قوییب یوباریش پروسه‌سینی 20- حمل گه باشله‌دی و حاضرگچه 18 ولایت ده مذکور گروه نینگ 550 محبوسی نی قوییب یوبارگن.
ملی خوفسیزلیک کینگشی نینگ ایتیشیچه، بو گروه نینگ باشقه 950 محبوسی جمهوررئیس نینگ بویروغی اساسیده، قوییب یوباریله‌دی.
طالبان حاضرگچه دولت نینگ 60 محبوسی نی ایکی باسقیچ ده قوییب یوبارگن.
اوتگن کون ناتو بیر اعلامیه ترقه‌تیب، افغانستان ده بیر تینچلیک کیلیشووی ایجاد ایتیلیشی اوستیگه اورغولب و برچه تامان‌لردن زوروانلیک نی کمه‌یتیریش توغریسیده بیرگن وعده‌لرینی عمل گه آشیریش‌لرینی سوره‌دی.
شونینگدیک مذکور تشکیلات غنی و عبدالله نینگ آره‌سیده‌گی جنجللر توغریسیده ایتیشیچه، افغانستان سیاستچی‌لری بو فرصتدن فایده‌لنیش بیلن جنجل‌لرینی حل ایتیب «فراگیر» بیر حکومت تشکیل ایتیش‌لری کیره‌ک.
عین حالده ناتو طالبلردن زوروانلیک میزانی نینگ کمه‌یتیریش‌لرینی سوره‌دی. اوشبو تشکیلات نینگ اعلامیه‌سیده کیلیشیچه، طالبان ایشانچ قولگه کیلیتیریش اوچون، افغانستان ینه بیر مرته ترورچیلر اوچون تینچ بیر اویه بولمه‌سلیگی توغریسیده بیرگن وعده‌لرینی عمل گه آشیریشی کیره‌ک.
عین حالده آمریکا مدافعه وزیری مارک اسپر نینگ ایتیشیچه، آمریکا و اونینگ ناتو تشکیلاتی‌ده‌گی بیرلشیک‌لری، طالبلردن افغانستان‌لیکلرارا سوزلشوولر باشله‌نیشی گه زمینه یره‌تیلیشی اوچون زوروانلیک میزانی نینگ کمه‌یتیریشی نی سوره‌شگن.
اونینگ کوپه‌یتیریشیچه، برچه تامانلر حاضرگی فرصتدن فایده‌لنیب و دواملی بیر تینچلیک تأمین ایتیلیشی اوچون سعی و حرکت قیلیش‌لری کیره‌ک.
