طالبان نینگ ایتیشیچه، اوشبو گروه نینگ 3 کیشیلیک هیأتی محبوسلرنی قوییب یوباریش اوچون کابلده بولگن و بوگون «سهشنبه، 19- حمل» دن باشلب نتیجهسیز ییغینلرده اشتراک قیلمهیدی.
قطرده طالبان گروهی نینگ سیاسی دفتری سوزلاوچیسی سهیل شاهین نینگ ایتیشیچه، اوشبو گروه نینگ هیأتی محبوسلرنی تانیش اوچون کابل گه یوباریلگن، چونکه بیریلگن سوز اساسیده، محبوسلرنی قوییب یوباریش جریانی باشلهنیشی گه قرار قیلینگن ایدی. بیراق اونگه کوره، بو جریان تورلی بهانهلر بیلن توختهتیلگن و شو یوزهدن بو گروه نینگ تخنیکی هیأتی «طرفلر» بیلن ییغینده اشتراک قیلمهیدی.
شاهین نینگ اوز توییتر صحیفهسیده یازیشیچه، بو گروه «آمریکا بیلن امضالنگن کیلیشوونامه اساسیده، محبوسلر کمیسیونی نینگ تخنیکی تیمی نی محبوسلرنی تانیب و تصدیقلش اوچون کابل گه یوبارگن، بیراق تأسف بیلن تورلی بهانهلر اساسیده، اولرنی قوییب یوباریش حاضرگهقدر توختهتیلگن.»
اوتگن هفته سهشنبه کون طالبان گروهی، بو گروه نینگ 3 کیشیلیک هیأتی محبوسلرینی قوییب یوباریش اوچون کابل گه ییتیشگنیدن خبر بیرگن ایدی.
اوندن بیر کون اوتگنیدن سونگ، ملی خوفسیزلیک کینگشی نینگ دفتری، دولت گه عاید تینچلیک علاقهسی بوییچه بیرینچی گروه نینگ تخنیکی کمیتهسی بیلن طالبان نینگ هیأتی محبوسلر قوییب یوباریلیشی توغریسیده کابلده صحبت قیلیشیدن خبر بیرگن ایدی.
بیراق، اوتگن کون «دوشنبه» کابلده محلی ارگانلر ایرکین ادارهسینی عمومی باشلیغی و طالبان گروهی بیلن تینچلیک توغریسیده مذاکره قیلووچی هیأت اعضاسی عبدالمتین بیک نینگ ایتیشیچه، طالبان نینگ محبوسلری قوییب یوباریلیشی توغریسیده افغانستان حکومتی بیلن صحبت قیلیش اوچون کابل گه کیلگن مذکور گروه نینگ 3 کیشیلیک هیأتی، کابل شهریده کته تروریستی عملیاتلرده قولی بولگن 15 ییریک قومندانی قوییب یوباریلیشینی سورهگن.
اونینگ ایتیشیچه، بو محبوسلر قوییب یوباریلیشی امکان سیز دیر و دولت مذکور گروه نینگ آز خطری بولگن 400 محبوسینی قوییب یوباریش گه قرار قیلیگن، بیراق طالبان قبول قیلمهیدی.
جناب بیک نینگ علاوه قیلیشیچه، طالبان نینگ بویوک عصیانچی هجوملرده قوللری بولگن 15 ییریک قومندانی قوییب یوباریلیشی مملکت ده ولایتلر سقوط قیلیشی و زوروانلیکلر دوام ایتیشی گه سبب بولهدی.
بیراق، قطرده طالبان گروهی نینگ سیاسی دفتری سوزلاوچیسی نینگ ایتیشیچه، اوشبو 15 کیشی ایلگریدن افغانستان حکومتی بیلن شریک قیلینگن 5 مینگ محبوس نینگ رویخطی گه شامل بولگن و اولرنینگ قوییب یوباریلیشی باشقه محبوسلرنی تانیش خصوصیده، طالبان نینگ تخنیکی گروهی گه یاردم بیریش اوچون لازم دیر.
