نمایندهلر کینگشی اعضالری نینگ تینچلیک جریانیدن خواطر بیلدیریب ایتیشلریچه، افغانستانلیکلر ارا سوزلشوولر عرفهسیده تینچلیک جریانی خصوصیده هیچکیمگه معلومات بیریلمهیدی و نیمه واقعه یوز بیریشینی بیلمهیدیلر.
نمایندهلر کینگشی باشلیغی میررحمان رحمانی نینگ اوشبو کینگش عمومی ییغینیده ایتیشیچه، تینچلیک سوزلشوولر جریانی نامعلوم دیر و یالغیز نمایندهلر کینگشی اعضاسی ایمس، بلکیم مذاکره قیلیووچی هیات اعضالری هم بو جریان قندهی آلغه آلیب باریلیشی و افغانستانلیکلر ارا سوزلشوولر قچان باشلهنیشینی بیلمهیدیلر.
عینحالده، سیاسی ایش بیلرمانلردن بیرقطاری نینگ ایتیشلریچه، آمریکالیکلر تینچلیک سوزلشوولر باشلهنیشینی ایستمهیدی و انهشو سبب، بوتوغریده اهالیگه معلومات بیریلمهیدی.
اولرنینگ ایتیشلریچه، آمریکالیکلر نیچه مرته افغانستانلیکلر ارا سوزلشوولر باشلهنیشینی ایستهگن، بیراق حاضرده سوزلشوولر برابریده بولگن بوتون موانعلر کوتاریلگن، لیکن آمریکالیکلر جیم تورگن.
سیاسی ایش بیلرمانلردن بیری محبالله شریف نینگ ایتیشیچه، تینچلیک جریانی ترامپ اوچون سیلاو کمپاینی صفتیده باشلنگن ایدی و حاضرگهقدر بوتون سوزلشوولر اوچینچی طرف نینگ غیابیده صورت تاپگن.
او، بوتون سوزلشوولر جریانی یاشیرینچلی شلکده اوتکزیلیشی و اهالیگه معلومات بیریلمهیشیدن خواطر بیلدیرگن.
بوندن آلدین افغانستان حکومتی طالبان محبوسلری نینگ قوییب یوباریلیش جریانی یکونلنگنیدن خبر بیرگن ایدی، بیراق اوتگن "سهشنبه" کونی طالبان سوزلاوچیسی محمد نعیم وردک نینگ ایتیشیچه، اوشبو گروه 100 محبوسی حکومت تامانیدن آزاد قیلینمهگن صورتده، سوزلشوولر باشلنمهیدی.
عینحالده، تینچلیک بوییچه دولت وزیرلیگی سوزلاوچیسی ناجیه انوری نینگ ایتیشیچه، طالبان بوتون محبوسلری اوشبو گروه ایستهگی اساسیگه آزاد قیلینگن و تینچلیک جریانیده بوتون طرفلرنی صادق بولیشی کیرهک.
اونینگ ایتیشیچه، بوتون موانعلر کوتاریلگن و افغانستانلیکلر ارا سوزلشوولرنی تیزلیککه باشلهنیشی کیرهک.
