پاکستان بوییچه افغانستان ایلچیخانهسی و بیرلشگن ملتلر تشکیلاتینینگ نمایندهلیگی رسمیلری، نیچه آیدن بویان مهاجرلرنی پاکستاندن افغانستانگه قیتریش نیتیده سعی و حرکت قیلماقدهلر.
بیراق، حکمتیار رهبرلیگیدهگی اسلامی حزب، افغانستان دولتینینگ بو حرکتیگه قرشی پاکستانده «مهاجر سیسی» ناملی بیر حرکت یولگه قوییب مهاجرلر قیتیشیگه توسیق بولهدی.
گلبدین حکمتیارنینگ اوغلی حبیبالرحمان حکمتیار، ایکی هفتهدن بویان اوشبو حرکتگه رهبرلیک قیلیب مهاجرلر بیلن اوچرهشیب و اولرنی پاکستان دولتیدن حقلرینی آلیشگه آلقیشلهیدی.
اسلامی حزبگه تیگیشلی کیشیلرنینگ مهاجرلرگه ایتیشیچه، افغانستانده اولرنینگ قیتیشیگه حاضرگهقدر زمینه یرهتیلمه گن و پاکستان دولتی اولرنی زوردن چیقارمهسی کیرهک.
بیراق، پاکستان بوییچه افغانستان ایلچیخانهسی مهاجرلر ایشلری بوییچه مسؤولی استانهگل احمدزینینگ سلاموطندارگه ایتیشیچه، اسلامی حزب تامانیدن سلبی کمپاین یولگه قوییلگن و بو حرکت مهاجرلر اوستیگه تأثیر قویمهیدی. جناب احمدزیگه کوره، حکمتیار اسلامی حزبینینگ بو ایشی آرقهسیده، شخصی منفعت ایزلنهدی.
عین حالده، سیاسی ایش بیلرمان یونس فکورنینگ ایتیشیچه، تینچلیک سوزلشوولریده اسلامی حزب مهاجرلر قیتیش مسئلهنی قبول قیلگن ایدی؛ بیراق حاضر سوزلشوولر سونگی باسقیچیگه ییتیشگن و بو حزب مهاجرلر مسئلهسیدن فایدهلنیب امتیاز آلماق نیتیده بولگن.
جناب فکورنینگ ایتیشیچه، تینچلیک سوزلشوولری باشلهنیشیده اسلامی حزب افغانستان حکومتیدن مهاجرلرگه اردوگاه توزهتیش اوچون بیر ییرنی کورسهتیب و بو حزبنینگ اختیاریده قوییشنی ایستهگن ایدی.
اوشبو سیاسی ایش بیلرمانگه کوره، اسلامی حزب اوزینی کته کورسهتیب و مهاجرلر گروهی بیلن مملکتگه کیریش نیتیده بولگن؛ انه شو سبب، تینچلیک کیلیشوویگه قول قوییلمسدن آلدین، مهاجرلر افغانستانگه قیتمهسینی ایستهیدی.
اسلامی حزب حاضرگچه خیبرپشتونخواه و پیشاورنینگ ایریم منطقهلریده مهاجرلرنینگ نمایندهلری بیلن اوچرهشیب و مهاجرلرنینگ اردوگاهلریدن بیریده خبری بیر ییغین اوتکزگن.
عین حالده، پاکستاندن افغانستان مهاجرلرینینگ قیتیشی دوام ایتماقده و دولت رسمیلرینینگ ایتیشیچه، مهاجرلر قیتیشی خصوصیده، مملکتده زمینه یرهتیلگن.
