بیرلشگن ملت‌لر تشکیلاتی القاعده ترماغی فعالیت‌لری خصوصیده تیکشیرو بولیمی ینگی گزارشی‌ده، افغانستان‌ده عصیانچی گروه‌لر فعالیت‌لری توغری‌سیده یازگن، داعش گروهی بیر قسمی افغانستان‌نی 25 ولایتی‌ده نفوذ قیلیب و عسکر آلماقده.
بو گزارش بیرلشگن ملت‌لر تشکیلاتی‌گه عضوی بولگن مملکت‌لر انسان حقوق‌لری ییل‌لیک ییغینی اوچون تیارلنگن. بیرلشگن ملت‌لر تشکیلاتی تیکشیرو کمیته‌سی گزارشی‌نی بیرقسمی‌ده افغانستان امنیتی کوچلری‌نینگ سوزلری‌گه اشاره قیلینیب یازیلگن، حاضرگچه طالب‌لر گروهی‌دن 10 فایزی داعش گروهی‌دن حمایت بیلدیریب، دولت اسلامی گروهی‌گه قوشیلگن‌لر.
داعش گروهی میلادی 2014- ییل باشیده بارلیگینی معلوم قیلدی و تیزلیک‌ده عراق و سوریه مملکت‌لر کوپینچه بولیم‌لریده فعالیت‌گه باشله‌دی. اوشبو گروه رهبری ابوبکر البغدادی، اولیمی یاشیریلگن طالب‌لر گروهی سابق رهبری ملاعمردن اونگه قوشیلیشینی سوره‌دی. بیراق طالب‌لر گروهی اعضاسی ملاعمر آتی‌دن داعش گروهی رهبری ایسته‌گینی رد ایتدی.
بیراق کورینیشیچه، داعش گروهی افغانستان بیر قسمی‌ده هم نفوذ قیلگن و طالب‌لر گروهی سیاسی و حربی جهت‌دن کوچسیزلنیشی خصوصیده سعی و حرکت قیله‌دی. بیرلشگن ملت‌لر تشکیلاتی خاص کمیته گزارشی‌دن نقل بولیشیچه، داعش گروهی جنگری‌لریدن 70 فایزی افغانستان چیگره‌لریدن تشقری اوشبو مملکت‌گه کیلیب و مذکور گروه مرکزی‌نی تشکیل ایتکن.
بیرلشگن ملت‌لر تشکیلاتی تیکشیرو بولیمی گزارشی‌گه کوره، القاعده ترماغی کوچلری، اوزبیکستان و پاکستان‌لیک جنگری‌لر داعش گروهی دعوتی بیلن افغانستان کیلیب، اوشبو گروه‌گه قوشیلگن‌لر.
حاضر داعش گروهی افغانستان شرقی قیسمی، اینیقسه ننگرهار ولایتی‌ده آچیق صورتده، افغانستان دولتی‌گه قرشی کوره‌شه‌دی. اوشبو گروه اعضالریدن بیرقسمی افغانستان جنوب غربی و جنوبی منطقه‌لریده طالب‌لر بیلن کوره‌شماقده. بیرلشگن ملت‌لر تشکیلاتی گزارشی‌ده کیلیشیچه، افغانستان حربی کوچلری و دولتی حاضرگه قدر داعش گروهی فعالیت‌لرینی جدی تهدیددیب بیلمه‌یدیلر؛ بیراق ینگی معلومات‌گه کوره، اوشبو گروه ینگی کیشی‌لرنی اوز اختیاریده آلیب، افغانستان ثباتی و امنیتی اوچون کته تهدید بوله‌آله‌دی.
