تینچلیک عالی کینگشینینگ رسمیلری، طالبلرنی رهبری ملامنصورنینگ اولیمی توغریسیدهگی خبرگه اشاره قیلیب ایتیشیچه، اونینگ اولیمی افغانستان دولتی بیلن مذکور گروهنینگ اورتهسیده تینچلیک سوزلشوولری باشلنیشیگه زمینه یرهتهدی.
امیریکه مدافعه وزیرلیگی، اوتگن (کیچه، 1- جوزا) بیر خبرنامه ترقهتیب، پاکستان توپراغیده ملامنصورنینگ انتقال بیرهدیگن موتر امیریکهلیک اوچووچیسیز اوچاق هجومیگه دوچ کیلگنیدن خبر بیرگن. بیراق، اوشبو خبرنامه اساسیده، طالبلر رهبرینینگ اولیمی یا-ده اولمهگنی حاضرگچه آچیقلنمهگن.
تینچلیک عالی کینگشی سوزلاوچیسی امینالدین مظفرینینگ ایتیشیچه، ملامنصورنینگ اولیمی طالبلر گروهی اجرهلیشی و یا-ده اوشبو گروه بیرلشیشیگه سبب بولهدی. اونینگ ایشانچیگه کوره، ایکی حالتده هم تینچلیک سوزلشوولری اوچون یخشی فرصت یرهتیلهدی.
جناب مظفریگه کوره، ملامنصورنینگ اولیمی طالبلرنینگ بیرلیگیگه سبب بولگن تقدیرده، تینچلیک سوزلشوولری آدرسی بیللی بولیشی ممکن؛ اونینگ اولیمی طالبلرنینگ اجرهلیشیگه سبب بولگن صورتده، اوشبو گروهنینگ بیر بولیمی تینچلیک سوزلشوولریگه قوشیلهدی.
عین حالده، بوگون (یکشنبه) کابلده وزیرلر کینگشی ییغینیده سوزگه چیقگن حکومت اجراییه باشلیغی داکتر عبدالله عبداللهنینگ ایتیشیچه، ملامنصورنینگ اولیمی تصدیقلنگن صورتده، طالبلرگه آغیر ضربه اوریلهدی و اوشبو گروه باشقه عصیانچیلیک هجوملرنی یولگه قوییشگه قادر بولمهیدی.
اجراییه باشلیغیگه کوره، ملامنصور تینچلیک سوزلشوولریگه ایشانمسدی و او طالبلر رهبری بولیب تعیین ایتیلگنیدن کیین، افغانستان خلقیگه قرشی هیچ قندهی جنایت و زورهوانلیکدن وازکیچمهگن.
جناب عبداللهنینگ کوپهیتیریشیچه، طالبلر رهبرینینگ اولیمی زورهوانلیککه دوام بیریشنی ایستمهگن جنگریلرنی تینچلیک لایحهسیگه جلب ایتهدی. او، ملامنصورنینگ اولیمینی بوندهی جنگریلرگه یخشی بیر فرصت دییدی.
سیاسی ایش بیلرمانلردن بیرقطارینینگ ایشانچیگه کوره، ملامنصورنینگ اولیمی طالبلر گروهی اجرهلیشیگه سبب بولهدی. طالبلرنینگ سابق رهبری ملاعمرنینگ اولیمی، مذکور گروه تامانیدن فاش ایتیلگنیدن کیین، اوتمیشدهگی بیرلیکنی قولدن بیریب و بو گروه ایکی شاخهگه اجرهلدی.
