د افغانستان د سوداګرۍ او صنایع خونې د یو شمېر نورو ولایتونو د سوداګرۍ خونو سره په ګډه د سولې خبرو په تړاو د خصوصي سکتور د اندېښنو او وړاندیزونو په اړه په یوې طرحې کار پیل کړی.
د سوداګرۍ او صنایعو خونې مرستیال خانجان الکوزی وايي، دې طرحه کې به خپل وړاندیزونه، اندېښنې او دوی ته د کاري اسانتیاوو برابرولو او د اقتصادي پیاوړتیا په برخه کې موارد په ګوته کړي.
ښاغلي الکوزي وویل، دغه طرحه به له چمتو کولو وروسته حکومت، طالبانو، د سولې عالي شورا او مشورتي لویې جرګې ته وړاندې کړي.
د هغه په وینا، دې طرحه کې به د سوداګرو لومړنۍ غوښتنه دا وي، که سوله راځي؛ نو باید پانګونې ته فرصتونه برابر او تضمین شي.
«دوی دا وړاندیزونه د سره خط په توګه په منظم ډول د سولی شورا، لویې جرګې، ولسمشر او مخالفینو ته وړاندې کوي.
پر همدې مهال د ښځو د سوداګرۍ او صنایع خونې مشره منیژه واقف اندېښنه څرګندوي، چې د طالبانو په راتلو سره به د ښځو لهپاره د فعالیت زمینه تنګه شي.
هغې وویل، اوسمهال مېرمنې د شاوخوا ۱۱۵۰ بېلابېلو تولیدي او نورو شرکتونو مشري کوي او له ۷ میلیونو ډېره پانګه لري چې پهدې توګه یې څه باندې ۷۵ زرو کسانو ته کاري فرصتونه برابر کړيدي.
د مېرمن واقف په وینا، دوی په خپلواکه توګه فعالیتونه او ولایتونو ته سفرونه هم کوي چې د طالبانو له راتللو وروسته د دغو مواردو د تضمین غوښتنه کوي.
دغه راز د سولې عالي شورا د دارالانشا مشر محمد عمرداودزي وویل، د نورو بنسټونو او وګړیو په څېر خصوصي سکتور هم حق لری چې د سولې په اړه مشورتي لویې جرګې او د سولې خبرو کې فعاله ونډه ولري او خپل وړاندیزونه، طرحې او اندېښنې وړاندی کړي.
