افغان ولسمشر محمد اشرف غني وايي، چې د افغانستان د اوبو پراختیا د ټولو ګاونډيو او د سیمې هېوادونو په ګټه دی.
نوموړي، چې " اوبو او دوامداره پرمختیا" تر عنوان لاندې جوړ شوي کنفرانس کې وینا کوله زیاته کړه، چې د افغانستان د اوبو پرمختیا په اړه دې هیڅ هېواد اندېښنه نهلري، بلکې پر وینا يې برعکس دغو هېوادونو ته به يې ګټه ورسيږي.
دا د اوبو په اړه څلورم ملي کنفرانس و، چې د افغانستان د اوبو او بندونو په اړه جوړيږي.
په دغه کنفرانس کې ولسمشر له ګاونډیانو وغوښتل، چې د افغانستان له لوري د اوبو له سرچینو له استفادې دې نور هېوادونه ملاتړ وکړي.
افغان ولسمشر وویل، د افغانستان اوبه مهمه طبیعي سرچینه او د افغانانو شتمني ده، چې تر اوسه د اوبو له واقعي اهمیت او ارزښت څخه بې خبره پاتې دي او دا يې هم وویل، چې د هېواد اوبه د سم تنظیم او مدیریت په برخه کې زیات کار ته اړتیا لري.
د غني پر خبره، که د افغانستان اوبه کنټرول شي، نو افغانحکومت به له ګاونډيو هېوادونو د برېښنا له واردولو هم خلاص شي.
نوموړي زیاته کړه: "د افغانستان د اوبو سرچینې په شتمنۍ بدلېدای شي او د هېواد یو تر ټولو مهمه سرچینه د هغه جغرافيايي موقعیت دی چې ۳ زره کاله یې دغه هېواد د تمدن په مرکز او څلور لارې بدل کړی و".
د هغه پر خبره، که د افغانستان سترې سرچينې سم مدیریت شي، نو تر راتلونکو ۲۰ کلونو پورې به یو متوسط سوکاله افغانستان ولرو.
د غني پر وینا، اوبه د افغانستان عزت دی او د عزت ساتل د افغان حکومت یو له اهدافو بلل کيږي.
" د هغه هېواد لهپاره چې لا یې هم د ۸۰ سلنې خلکو ژوند په کرنه ولاړ دی، د کرنیزو توکو واردول ملي شرم دی او له دغه شرم څخه باید ځانونه خلاص کړو".
ولسمشر محمد اشرف غني وویل، چې د اوبو په اړه د نړۍ قوانین د یو هېواد د رهنمايې په معنا ده.
د غني پر وینا، د افغانستان د اوبو هرې حوزې لهپاره باید ځانګړې کړنلاره جوړه شي.
له بل لوري، په دغه کنفرانس کې د هند سفیر منپریت هورا هم د اوبو د اهمیت په اړه خبرې وکړې.
د ویلو ده، چې دغه کنفرانس به تر راتلونکو درېيو ورځو پورې دوام وکړي.
