ملي شورا کې د ننګرهار، کونړ، لغمان او نورستان ولایتونو ځېنې استازي په یادو ولایتونو کې د ناامنیو زیاتوالي اندېښمن کړيدي.
ولسي جرګې کې د ننګرهار استازي عصمتالله شینواري نن (دوشنبې) کابل کې یوې خبري غونډې کې وویل، ختیځو ولایتونو کې امنیتي وضعیت ورځ تر بلې خرابېږي او که همداسې دوام وکړي؛ ښايي د کابل په ګډون ځېنو نورو ولایتونو ته یې هم لمن وغځېږي.
د نوموړي په وینا، مخکې په لېرې پرتو ولسوالیو کې ناامني وه؛ خو اوس خلک په ښارونو کې هم خوندي نهدي.
د لغمان، کونړ او نورستان ولایتونو استازیو هم په یاو ولایتونو کې د ناامنۍ زیاتوالي په اړه اندېښنې وښودې او له امینتي ځواکونو یې وغوښتل چې ورته جدي پام وکړي.
ولسي جرګې کې د ننګرهار استازي حضرتعلي بیا د امنیتي ځواکونو او بهرنیانو په پالیسیو کې د بدلون غوښتنه وکړه. نوموړي وویل، ننګرهار کې ۲۰ بېلابېلې وسلهوالې ډلې فعالیت کوي چې په وینا یې حکومت یې مخه نهنیسي.
خو د ملي دفاع وزارت د ویاند دفتر سرپرست محمد رادمنش په ختیځو ولایتونو کې د امنیتي ځواکونو له لوري د پوځي عملیاتو او لاستهراوړنو خبر ورکوي.
نوموړي د یادو ولایتونو له وکیلانو وغوښتل چې د امنیتي ځواکونو کمزوري ښودلو پرځای دې، د هغوی ملاتړ وشي.
ختیځو ولایتونو کې د ناامنیو زیاتوالي په اړه داسې مهال اندېښنې ښودل کېږي چې د راپورونو له مخې، په تېرو شاوخوا دوو میاشتو کې یوازې ننګرهار کې نږدې ۴۰ چاودنې شوي چې له کبله یې شاوخوا ۲۰۰ کسان وژل شوي او ۶۰۰ نور ټپیان شويدي.
