په تېرو درېیو ورځو کې د کندوز، بغلان او روزګان ولایتونو کې دولتي ځواکونو ته اوښتې مرګژوبلې د یادو ولایتونو د ولایتي شورا د غړيو اندېښنې راپارولې دي.
د سیمهيیزو سرچینو د ورکړل شویو شمېرو له مخې د دې جګړو پایله کې ۴۰امنیتي ځواکونه وژل شوي او ۲۰نور بیا ټپیان شوي دي.
د کندوز د ولایتي شورا مرستیال صفيالله امیري سلام وطندار ته وویل، په تازه مورد کې تېره شپه د کندوز دشت ارچي ولسوالۍ کې د طالبانو د بریدونو پرمهال د پوځ ۱۳سرتېري وژل شوي او ۷نور ټپیان شوي دي.
تېره ورځ هم د بغلان د پولیسو د درېیمې امنيتي حوزې د سمت امريت باندې د طالبانو برید پایله کې ۱۴ پوليس ووژل شول او پنځه نور ټپیان شول.
د کندوز او بغلان ولایتي شورا غړي غلام رباني رباني او شاجان ایوبي د امنیتي ځواکونو د مرګژوبلې د زیاتېدو لامل د دې ولایتونو په جګړهيیزو جبهو کې د امنیتي او دفاعي ځواکونو د بشپړو پوځي تجهیزاتو نه موجوديت په ګوته کوي.
په روزګان کې یوه امنیتي سرچینه چې نه غواړي نوم یې خپور شي سلام وطندار ته وايي، تېره ورځ طالبانو د دې ولایت مرکز ترینکوټ کې د پولیسو پر دوه پوستو برید وکړ.
د سرچینې په وینا، په دې برید کې ۱۲ پولیس ووژل شول او ۸ نور ټپیان شول.
د پېښې شاهدان وايي، طالبانو د دې پوستو تجهيزات له ځان سره یووړل.
هڅه مو وکړه چې په راپور کې د یادو ولایتونو کې د امنیتي چارواکيو، د ۲۱۷ پامیر قول اردو، د کورنیو چارو او دفاع وزارتونو نظر هم ولرو؛ خو یو له دوی هم ځواب ویلو ته حاضر نه شول.
د امنیتي ځواکونو پرضد د طالبانو له لوري پرلهپسې او مرګوني بریدونو په داسې حال کې زور اخیستی چې ځینو رسنیو د طالبانو د سرچینو په حواله راپور ورکړی چې د دې ډلې رهبرۍ د امریکا له استازيو سره د هېواد په لویو ښارونو کې د تاوتریخوالي په کموالي هوکړه کړې ده.
