بغلان ولایتی کینگش کاتبی بسم‌الله عطاش‌نینگ ایتیشیچه، مذکور ولایت مرکزی پلخمری شهری‌نینگ ایکی کیلومترلیگی‌ده‌گی دندغوری قیشلاغی اوتگن کیچه طالب‌لر قولی‌گه توشگن.
جناب عطاش محلی مسؤوللرنی تنقیدقیلیب ایتیشیچه، مذکور منطقه‌ده‌گی کوچلر نیچه کون طالب‌لرنینگ قمراوی‌ده قالگن و مرکز تامانیدن یاردم بیروچی کوچ یوباریلمه‌گن.
ولایتی کینگش اوشبو عضوی‌نینگ آگاه‌لنتیریشیچه، بو گروه‌نینگ نابود ایتیش اوچون تیزلیکده عملیات یولگه قوییلمه‌گن صورتده؛ شونینگ‌دیک یقین کونلرده بغلان ولایتی مرکزی قولدن کیتیشی ممکن.
اونینگ کوپه‌یتیریشیچه، حاضر مذکور ولایت «دهنه‌غوری» تومنی‌نینگ «دندغوری» منطقه‌سیدن اوته‌دیگن یولی یاپیلگن.
عین حالده، 209 شاهین قول اردو اوچنیچی لوا بیرینچی کندک قومندانی ضیاءالدین، بو سوزلرنی رد ایتیب ایتیشیچه، امنیتی‌کوچلر تلفات باشقریلیشی اوچون، تاکتیکی صورتده آرقه‌گه چیکیلگن.
شونینگ‌دیک اوشبو قومندان‌نینگ کوپه‌یتیریشیچه، اوتگن بیرهفته جریانیده مذکور منطقه‌ده امنیتی‌کوچلر و طالب‌لر اورته‌سیده یوزبیرگن توقنه‌شوولرده 25 جنگری طالب هلاک بولگن و باشقه 15 دن آشه‌راغی یره‌لنگن.
بیراق، طالب‌لرنینگ ایتیشیچه، بو توقنه‌شوولر جریانیده امنیتی‌کوچلردن 20 ته‌سی اولرگه قوشیلگن و شونینگ‌دیک 10 پولیس عسکرنینگ اولدیرگنلر.
شونینگ‌دیک، 209 شاهین قول اردو اوچنیچی لوا بیرینچی کندک قومندانی، بو رقم‌نی رد ایتیب ایتیشیچه، توقنه‌شوو جریانیده امنیتی‌کوچلردن 4 کیشی یره‌لنگن.
گزارشلرگه کوره، اوتکن هفته طالب‌لر شومنطقه‌دن بغلان ولایتی مرکزی‌نینگ نیچه موشک آرقه‌لی هدف قراربیرگن ایکن، نتیجه‌ده اونلرچه عایله اویلرینی ترک ایتیب، باشقه منطقه‌لرگه بدرغه بولگن‌لر.
عین حالده، بغلان امنیتی مسؤول‌لری‌نینگ ایتیشیچه، بو توقنه‌شوولرده تلفات بیرمسلیک اوچون سعی و حرکت قیله‌دیلر. اولرنینگ اورغولشیچه، منطقه‌نی تیزلیکده طالب‌لرنینگ قولیدن قیته آله‌دیلر.
طالب‌لرنینگ بو هجومی، اوتکن هفته سه‌شبنه کون، پاکستان‌نینگ «مری» شهریده، افغانستان حکومت نماینده‌لری و طالب‌لرنینگ بیرقطار اعضالری اورته‌سیده بیرینچی دور رسمی تینچ‌لیک سوزلشوولری اوتکزیلگن بیرچاغده یوزبیرگن.
بو اولتیریشده اشتراک ایتکن تشقی ایشلر وزیرلیگی سیاسی اورین باسری حکمت‌خلیل کرزی‌نینگ اوتکن پنج‌شنبه کون بیر خبری ییغینده ایتیشیچه، سونگی تینچ‌لیک اولتیریشی‌ده بحث‌گه آلینه‌دیگن موضوع‌لردن بیری، حکومت و طالب‌لر اورته‌سیده اوروش توخته‌تیلیشی دیر.
