.JPG)
ترکمنستاندن کیلتیریلهدیگن برق سالنگلر یولیدن اوتکزیلیشی بارهسیده ینه بیر مرته تاکید قیلگن برشنا شرکتینینگ مسووللری، مملکتنینگ مرکزی ولایتلری جملهدن بامیان و دایکندی – کابل و جنوبی ولایتلردن کوره تیز برق یاروغلیگیدن فایدهلنهدیلر دیگنلر.
برشنا سوداگرلیک ادارهسینینگ باشلیغی میرویس عالمینینگ بوگون (چهارشنبه) مطبوعات انجمنیده ایتیشیچه، افغانستان حکومتی و 500 کیلواتلیک برق اوتکزیلیشینی حمایت قیله دیگنلر کیلگوسی ایکّی ییلده مرکزی ولایتلرگه برق ییتکزیلیشینی وعده بیرگنلیکلرینی تیلگه آلگن.
عین حالده، جناب عالمینینگ آگاهلنتریب ایتیشیچه، ترکمنستاندن کیلتیریله دیگن برق موضوعی بوندن کوپراق سیاسی و جنجالی بولگن تقدیرده، لایحهنی حمایت قیلهدیگنلر بو ساحهده سرمایه یاتقیزیشدن قول کوتاریشلری ممکن دیگن.
بونگه قرهمی، بوگون ملی مجلسنینگ ییغینیده نمایندهلرنینگ بیر قطاری، توتاپ لایحهسی بامیان یولیدن اوتکزیلیشی اوستیده تاکید قیلگنلر. نمایندهلر حکومت و برق ادارهسینی تینگلیکنی نظرده توتمهگنلیکده عیب لهگنلر.
نمایندهلر مجلسینینگ اعضاسی غلام حسین ناصری، بامیاندن آلیب اوتیلهدیگن برق لایحهسی سالنگلردن اوتکزیلیشی اوچون ملی بیرلیک حکومتی تامانیدن قرار آلینیشی انسانیتگه قرشی بیر حرکت دیگن.
بوندن آلدین آلمانلیک فیشنر شرکتی تامانیدن اوتکزیلگن تیکشیروده مذکور لایحه بامیان یولی بیلن اوتکزیلیشی ایشانچی و خوفسیزلیگی تامین ایتیلیشینی بیلدیرگن ایدی. لیکن، برشنا سوادگرلیک ادارهسینینگ باشلیغی، بو توغریده قیتهدن اوتکزیلگن تیکشروده لایحه سالنگلر یولیدن آلیب اوتیلیشی فاصله قیسقهریشی همده کم خرجت کوتاریشگه باعث بولهدی دیگنلر.
اوتگن کون حکومت یوقاری مرتبهلی رسمیلری همده ملی مجلس بیر قنچه اعضالری اعتراض بیلدیریب، برق بامیان یولیدن اوتکزیلمهگن حالده، تیزیمده خذمت قیلیشدن واز کیچشنی بیلدیرگنلر.
