د بدخشان یوشمېر مدني فعالان، د ولایتي شورا رییس او ځایي خلک وایي، که په دې ولایت کې د له لاسه تللیو سیمو بېرته نیولو لهپاره عملیات پیل نهشي د ناامنیو لمن پراخېږي.
د بدخشان ولایتي شورا رییس بشیرصمیم وایي چې اوس د دغه ولایت دوې ولسوالۍ په بشپړه توګه او یوولس نورې هغه په بېلابېلو کچو د طالبانو تر واک لاندې دي.
د ښاغلي صمیم په وینا د ژمي موسم یو ښه فرصت دی چې چاڼیز عملیات ترسره شي او که حکومت په دغه موسم کې چې طالبان د خپلو کسانو پر تجهیز بوخت دي؛ عملیات ونه کړي دا ډله به په تاوده موسم کې سترعملیات وکړي.
دغه راز د بدخشان یو مدني فعال جاهدالله پیام وایي چې په دې ورستیو کې امنیتي ګواښونه ډېر شوي او د بدخشان مرکز فیض اباد هم تر امنیتي ګواښ لاندې دی.
د ښاغلي پیام په وینا، که د حکومت لهخوا چاڼیز عملیات ونه شي تر ګواښ لاندې ولسوالیو مرکزونو د سقوط ترڅنګ به د فیض اباد ښار هم خوندي پاتې نه شي.
په همدې حال کې د بدخشان والي احمد فیصل بېګزاد هم وایي چې که د وردوج او یمګان ولسوالیو او د جرم ولسوالۍ په ځینو برخو کې عملیات ونه شي په بدخشان ولایت کې به د ناامنیو ستونزې نورې هم ډېرې شي.
د والی په وینا د عملیاتو پلان حکومت ته استول شوی دی او دعملیاتو پیل لهپاره د حکومت امر او مرستې ته په تمه دي.
سره له دې چې د بدخشان چارواکي د طالبانو تر ولکې لاندې سیمو کې د ډېر ژرعملیاتو پیلېدو خبرې کوي خو د بدخشان ځینې اوسېدونکي او د ولایتي شورا غړي بیا پر دې ژمنو باورنه لري؛ دوی وایي حکومت په وار وار د عملیاتو ژمنې کړي خو هېڅ یوه ژمنه یې هم تراوسه نه ده عملي شوې.
