سلګونو کندوزیانو په هوايي برید کې د ولسي خلکو د وژنې په غبرګون لاریون وکړ

د کندوز ولایت سلګونو اوسېدونکو د بهرنیو ځواکونو هوايي برید په غبرګون چې ۳۰ ولسي خلک په کې ووژل شول او له ۳۰ تنو زیات په کې ټپيان شول لاریون وکړ.

دغه برید د کندوز ولایت د بوز کندهاري په سیمه کې شوی، چې ۲۶ وسله وال طالبان هم په کې وژل شوي دي.

لاریونوال وايي، چې د تېرې شپې له ۱۰ بجو تر سهاره افغان او نړیوالو ځواکونو د دوی پر کورونو د بمبارۍ ترڅنګ ګولۍ هم ویشتلي، چې په پایله کې يې د ۱۵ ماشومانو، ۴مېرمنو په ګډون ۳۰ ولسي وګړي وژل شوي دي.

د کندوز والي اسدالله امرخېل د هوايي بمباریو په ترڅ کې د ۳۰ ولسي خلکو وژل کېدل او ۲۶ تنو د ټپي کېدو خبر مني، خو وايي، چې په دې کلي کې د ځانګړو ځواکونو په عملیاتو کې ۲۸ طالبان هم وژل شوي دي.

امرخېل وايي، ولسي خلک هغه مهال ووژل شول، چې امنیتي ځواکونه د وسله والو طالبانو له خوا کلابند شول او مرستې ته یې هوايي ځواک ورغی.

د کندوز والي وايي، د پېښې د څرنګوالي معلومولو له پاره کمېسیون ټاکل شوی.

په ورته وخت کې ولسمشر غني په کندوز کې د ولسي خلکو د وژل کېدو په اړه خپګان ښودلی دی.

ولسمشرۍ ماڼۍ د یوې خبر پاڼې په خپرولو سره لیکلي، چې غني د کندوز والي او په دې ولایت د امنیتي ځواکونو مسوولینو ته هدایت ورکړی، چې د عملیاتو پر مهال له پوره غور او دقت څخه کار واخلي.

په خبرپاڼه کې راغلي، چې ولسمشر غني د پېښې د څېړلو او عاملینو ته یې د سزا ورکولو په پاره پلاوی ګومارلی دی.