د ولسي وګړو د خوندیتوب بنسټ په هېواد کې د ورستیو جګړو له امله د بې ځایه شویو کورنیو په اړه اندېښنه لري.
د دغه بنسټ مسولین نن ( مې ۳۱مه) په کابل کې د یوې خبري ناستې په ترڅ کې وویل، چې په بېلا بېلو ولایتونو کې د جګړو ډېرېدل په هېواد کې د کورنیو د بې ځایه کېدو لامل شوي.
د ولسي وګړو د خونديتوب بنسټ غړې کریمه کریمي وايي، چې که په هېواد کې د بې ځایه کېدو شمېر پراختیا و مومي، نو د دغو کورنیو ځوانان به د وسله والو مخالفینو د جلب او جذب لیکې پیاوړې کړي او د حکومت له پاره به په لوی ګواښ بدل شي.
میرمن کریمي زیاته کړه، چې د بې ځایه شویو کره شمېر معلوم نه دی خو نړېوال او ملي بنسټونه وايي، چې له ۸۰۰ زرو نه تر یو میلیون پورې اټکل شوي دي.
د دې په خبره د کره شمېر نشتوالی د مرستو کمېدو لامل کیږي.
دغه بنسټ وايي، چې وروستۍ ناامنۍ د بې ځایه شویو کورنیو د صعود لامل شوي دي.
دغه بنسټ د کندوز ولایت د کډوالو ریاست په حواله وايي، چې د وروستیو نښتو له امله په تېرو ۲ اونیو کې ۱۸ زره کورنۍ بې ځایه شوي دي.
خو د کریمې په وینا د کډوالو وزارت د بې ځایه شویو کورنیو له پاره د بېړني مرستې په برخه کې ځانګړې بودیجه نه لري.
له بله لوري د ولسي وګړو د خوندیتوب بنسټ د تېرو کلونو د بې ځایه شویو کورنیو د ناسم حالت نه اندېښنه ښکاره کوي.
میرمن کریمي وايي، چې دغه کورنۍ په ناوړه اقتصادي حالت کې شپې او ورځې سبا کوي.
ده وویل، چې د دغو کورنیو ماشومان زده کړو ته لاسرسی نه لري او دغه چاره د دوی په ژوند ژوره اغیزه لرلی شي.
د دغه بنسټ په باور د بې ځایه شویو کورنیو د بېرته ستنېدو له پاره هیلې نشته.
د وسله والو طالبانو پسرلني عملیات د هېواد په بېلا بېلو برخو کې او پر وړاندې یې د امنیتي ځواکونو جګړه د دې لامل شوي، چې ولسي خلک خپل کورونه پرېږدي.
