.jpg)
بدخشان ولایتی‌نینگ جرم تومنیده امنیتی کوچلر تامانیدن یولگه قوییلگن تازه‌لش عملیات‌دن اوچ کون اوتماقده. اوشبو ولایت امنیتی رسمی لری عملیات یخشی بیر شکلده آلغه باریب و قولدن کیتگن منطقه‌لر قیته‌دن نظارت گه آلینگنینی بیلدیره دیلر و خلق نماینده‌لری ایسه، عملیات جریانیده بی‌فرق یانده‌شیلیشی و تینچ اهالی قربانلیگی کوپه‌یگنینی ایته‌دیلر.
نماینده‌لر کینگشی اعضاسی زلمی مجددی، اوز فیسبوک صحیفه‌سیده یازیب، بو عملیات هوایی حمایه بولمه‌گنی باعث، تینچ اهالی گه تلفات و مالی زیانلر ییتکزیشی دن باشقه هیچ قنده‌ی نتیجه بیرمه‌گنینی ایتگن.
شونینگ‌دیک، بدخشان ولایت کینگشی اعضاسی عبدالله ناجی نظری‌نینگ ایتیشیچه، امنیتی کوچلر و طالب‌لرنینگ آره‌سیده یوز بیرگن آتیشمه‌ده تینچ اهالی گه زیان ییتیشگن. جناب نظری، افغانستان دولتی و طالب‌لردن اوروش قانونلرینی نظرگه آلیش‌لرینی سوره‌یدی.
.jpg)
بیراق، بدخشانده حربی کوچلر پیاده لوا قومندانی محمدنعیم مجیدی بولگن ادعالرنی رد قیلیب ایتیشیچه، امنیتی کوچلرنینگ قوشمه عملیاتی نتیجه‌سیده، شمال و شمال‌شرق حوزه‌سیده چیت ایللیک طالب‌لرنینگ حربی مسؤولی اورین باسری ملا مصطفا شامل 7 جنگری طالب هلاک و باشقه 13 جنگری طالب یره‌لنگن.
جناب مجیدی گه کوره، اوشبو عملیات ده کیب، کتیب، ولاریب قیشلاقلری و فرغامیرونینگ ایریم بولیم‌لری طالب‌لرنینگ نظارتی‌دن چیقاریلگن.
جرم بدخشان ولایتی‌نینگ ناتینچ تومنلریدن سنله‌دی. محلی مسؤوللرگه کوره، حاضر مذکور تومن‌نینگ 60% توپراغی طالب‌لرنینگ نظارتی‌ده دیر.
