سارک مدنی باشیکینتی بامیان ولایتیده ایپک یولی 7- کورگزمهسی بیلن سارک مدنی کورگزمهسی دوشنبه کون مدنیت و معلومات وزیرلیگی رهبرلیک هیأتی، سارک هیأتی و سارک عضوی بولگن مملکتلر نمایندهلری حضوریده رسمی شکلده آچیلدی.
بامیان شهری سونگی پیتلرده میلادی 2015- ییل جنوبی آسیا منطقه همکارلیک تشکیلاتی (سارک) بیرینچی مدنی باشکینتی بولیب سیلندی.
بامیان والیسی محمدطاهر ظهیر، اوشبو آچیلیش مراسمده سارک عضو بولگن مملکتلر بیلن افغانستان ارا سیاسی و اقتصادی مناسبتلر مستحکملنیشی و کوچلنیشی اوستیگه تأکیدلب ایتیشیچه، بو مناسبتلر کیلهجکده منطقه اوستیگه هم ایجابی تأثیر تشلهیدی. اونینگ ایتیشیچه، محلی اداره و بامیان خلقی بو مناسبتلر کینگهییشی و تأمینلنیشینی ایستهیدی.
عین حالده، سارک صنعتی کمپی مسؤولی کارماترینینگ ایتیشیچه، سارک مدنی مرکزی صنعتچیلرگه زمینه یرهتیش و اولرنی بیر ییرده توپلب نقاشلیک آبدهلرینی کورگزمهگه قوییش توغریسیده سعی و حرکت قیلگن.
اونگه کوره، سارک مدنی باشیکینتینی سیلشدن مقصد، مدنی و اجتماعی مسئلهلر اورتهسیده علاقه باغلش، اقتصادی عایدلر و شونینگدیک، سلنگن محلدن یخشی صورت بیان ایتیش دیر.
مدنیت و معلومات وزیرلیگی مدنی اورین باسری مصدق خلیلینینگ، اوشبو آچیلیش مراسمده ایتیشیچه، تاریخی بنالر و طبیعی منظرهلر باعث، بامیان ولایتی سارک مدنی بیرینچی باشکینتی صفتیده سیلنگن.
جناب خلیلیگه کوره، بامیانده طبیعی منظرهلر و تاریخی بنالر زیان کورگن صورتده، اوشبو ولایت دنیا مدنی میراثی لایحهسیدن حذف بولیشی ممکن.
او، مذکور ولایت خلقی، نمایندهلری و رسمیلریدن بامیانده طبیعی منظرهلر و تاریخی بنالرنی سقلهشینی سورهدی.
اوشبو بیرهم، دوشنبه کون ایرتهلب باشلندی و تورت کونگچه ایریم برنامهلر جملهدن محلی ییمکلر کورگزمهسی، بودا هیکلی نمایشی، قول صنعت کورگزمهسی، موسیقه و باشقه تفریحی برنامهلردن عبارت بولگن.
