د بامیان ولایت د ښځو چارو په ریاست کې د ښځو لپاره د یوه ځانګړي کتابتون په پرانستلو د مارچ اتمه چې د ښځو د پیوستون نړېواله ورځ ده، ونمانځل شوه.
د بامیان ولایت د ښځو چارو رییسه کریمه سالک وايي، دغه کتابتون د یو میلیون افغانیو په ارزښت د اغاخان پراختیايي بنسټ له لوري جوړ او ګټې اخیستو ته سپارل شوی چې ۴ زره ټوکه کتابونه، د مطالعې سالون او انټرنېټ خونه هم لري.
سالک وویل، ښځې حق لري چې د نارینهوو په څېر د مطالعې لپاره یوې مناسبې فضا ته لاسرسی ولري.
د هغې په وینا، د ښځو لپاره د دغه ځانګړي کتابتون د جوړېدو موخه، د ښځو په منځ کې د کتاب لوستلو فرهنګ بنسټیز کول او د دوی ظرفیت لوړول دي.
په همدې حال کې د بامیان یو شمېر ښځې د دغه کتابتون د پرانستل کېدو د هرکلي ترڅنګ وايي، که څه هم په دغه ولایت کې ډېر کتابتونونه شته، خو د ښځو لپاره د مطالعې مناسب ځای نهلري.
د بامیان ولایت اوسېدونکې فاطمه احمدي وايي، دغه کتابتون د ښځو د مطالعې لپاره یو خوندي چاپېریال دی او هغوی کولای شي چې د خپل علمي پوهاوي کچه پهکې لوړه کړي، خو په وینا یې، دولتي ادارې او نورې مرستندویې موسېسې باید ورته نور کتابونه هم راوړي.
د ښځو د انلاین بازارموندنې نندارتون پرانستل شو
جوزجان؛ ښځو د درې کلیو لارې وتړلې
غور کې د ښځو رستورانت جوړ شو
غور کې د ښځو لهپاره د ځانګړي هنري مرکز جوړېدل
د بامیان ولایت اوسېدونکې وايي، سره له دې چې ښځې په دغه ولایت کې له نسبي ازادیو برخمنې دي، خو لا هم د ښځو د پرمختګ فرصتونه او امکانات پهکې کم دي.
دوی له هغو بنسټونو چې د ښځو د حقونو تامینولو په برخه کې کار کوي غواړي چې د ښځو د حضور او پرمختګ لپاره اسانتیاوې برابرې کړي چې د ښځو پر وړاندې شته تاوتریخوالی له منځه لاړ شي.
د بامیان ولایت د ښځو چارو ریاست د موندنو پر بنسټ، سږ کال په دغه ولایت کې د تېر هغه په پرتله د ښځو پر وړاندې تاوتریخوالی کم شوی چې کچه یې له ۱۶۰ موردو نه ۱۱۰ ته را ټیټه شوې ده.
