له پانګونې د ملاتړ ادارې چارواکي وايي، سره له دې چې په هېواد کې افغانې ښځې د امنيتي او فرهنکي ستونزو سره مخ دي، خو بیا هم دوی د هېواد په اقتصادي وده کې د پام وړ کارونه کړي دي.
د یادې ادارې په وينا، د دغو لاسته راوړنو څخه یو هم د خصوصي سکټور په برخو کې د پام وړ پانګونه ده.
د افغانستان له پانګونې د ملاتړ ادارې یا ایسا رییس محمد قربان حقجو په هغه غونډه کې، چې د ښځو نړېوالې ورځې په مناسبت جوړ شوی وو وویل، تر اوسه د افغانستان په سوداګرۍ خونو کې له ۶۰۰ زرو څخه زیات د سوداګرۍ جوازونه اخیستل شوي، چې يوازې ۵ زره او ۸۰۰ جوازونه يې د مېرمنو په نوم ثبت شوي دي.
د دوی په وینا، دغه شمېره په سلو کې له یو څخه په کمه فیصدي، په پانګونو کې د افغانو ښځو د حضور ښودنه کوي.
نوموړي زیاته کړه:" په ایسا کې، چې کومې شمېرې له موږ سره ثبت دي؛ هغه ښځې، چې د مرستیالې، شریکې او یا هم مشرې په توګه په خصوصي سکټور کې برخه اخیستې د پانګونې کچه يې ۳۵۰ میلیونو ډالرو ته رسیږي".
حقجو زیاتوي، چې د تېرو دوو کلونو په پرتله په افغانستان کې د پانګونې کچه کمه شوې ده.
په همدې حال کې ځينې ښځينه سوداګرې هم په افغانستان کې د امنیت نه شتون، د ښځو پر وړاندې د خلکو منفي ذهن، د بازار موندنې له پاره د مناسب مارکېټ نشتوالی او له سوداګرو ښځو د خلکو نه ملاتړ او نور هغه ستونزې ګڼي، چې دوی يې اندېښمن کړي دي.
د شیرین قهرمان شرکت مسووله حنیفه فاطمي وايي:" دا چې سوداګرې ښځې مارکېټ نه لري، د حکومت او هغه بنسټونو له لوري ورته پام نه کيږي، چې ځانونه د ښځو ملاتړ کوونکي بولي او په ځلونو د حکومت له لوري د خپلو وعدو نه عملي کول دا ټول زموږ ستونزې دي".
په همدې حال کې د افغانستان له پانګونې د ملاتړ ادارې مسوولین وايي، چې د ښځو له پاره به په نژدې راتلونکي کې تشویقي برنامې جوړې کړي او په دې سره به د ښځو بنیادي ستونزې هم کمې شي.
