تخار ولایتیده سیلاو کونلریده یوز بیرگن قتیق اوروش‌لر باعث، مذکور ولایت‌نینگ دشت‌قلعه تومنیدن اونلرچه عایله اوی و جایلرینی ترک قیلیش‌گه مجبور بولگن‌لر. اوروش بدرغه‌لری تالقان شهری‌نینگ بیر چیکه‌سیده خیمه قورگن‌لر.
اولرنینگ ایتیشیچه، نان، سوو و کییم‌لری یوق دیر و حاضرگچه یاردم بیرووچی اداره‌لر اولرگه یاردم بیرمه‌گن‌لر.
7 فرزندنینگ آنه‌سی بولگن پری گل، نیچه وقت آلدین طالب‌لرنینگ اوروشی‌ده تورموش اورتاغی‌نی قولدن بیرگن.
اونینگ سلام‌وطندارگه ایتیشیچه، شهر اوستیگه طالب‌لر تامانیدن راکت آتیلگنی باعث، اوی و جایی‌نی ترک قیلیش گه مجبور بولگن. پری گل، حکومتی اداره‌لردن بدرغه‌لرگه یاردم بیریش‌لرینی سوره‌یدی.
حکومت رسمی‌لری و یاردم بیرووچی اداره‌لر، حاضرگچه بدرغه‌لرگه هیچ قنده‌ی یاردم بیرمه‌گن‌لر؛ بیراق تالقان شهری‌نینگ مندوی‌سینی کلانتری گلاب عطایی باشقه بیر کیشی‌نینگ همکارلیگی بیلن اوتگن ایکی کونده بدرغه‌لرگه سوو و آذیق-آوقت بیرگن.
اونینگ ایتیشیچه، یاردم بیرووچی اداره‌لرنینگ دقت‌سیزلیگی باعث، بدرغه‌لرگه یاردم بیریش اوچون قرار قیلگن.
عطایی گه کوره، بدرغه‌لرنینگ رقمی 150 دن 180 عایله گه ییتیشه‌دی، اوچ کون آلدین تالقان کیلگن‌لر و هر بیر دروازه گه باش اورگن‌لر؛ لیکن کیم‌سه سیس‌لرینی ایشیتمه‌گن.
عین حالده، تخار حاکمی سوزلاوچیسی جواد هجری‌نینگ ایتیشیچه، محلی اداره خیمه قورگن بدرغه‌لرنینگ وضعیتی‌نی تیکشیریش اوچون بیر هیأت تعیین قیلگن.
شونده‌ی بیرحالده، تخار ولایتی‌نینگ مهاجرلر ریاستی‌نی ایتیشیچه، جاری ییل باشلنگنیدن بویان تخارنینگ ناتینچ تومن‌لری و قندوزنینگ دشت‌ارچی تومنیدن 7 مینگ عایله بدرغه بولیب و تالقان شهری‌نینگ ایریم منطقه‌لریده جایلشگن.
تخار ولایتی‌نینگ مهاجرلر ریاستی مسؤوللریگه کوره، اوشبو ریاست حاضرگه‌قدر 2 مینگ‌دن آرتیق عایله گه آذیق-آوقت و نقد پول یاردم بیرگن.
