بلخ ولایتیده یوز بیرگن سونگی آتیشمه مزارشریف شهریده نوروز بیرهمی عرهفهسیده مهمانلرنینگ حضوری کمهییشی گه سبب بولگن.
مزارشریف شهری هر ییل نوروز بیرهمی عرهفهسیده ایچکری و تشقریدن کیلگن مینگلرچه مهمان گه میزبانلیک قیلهدی؛ بیراق بو ییل کورینیشیچه، نوروز بیرهمی اوتگن ییللر کبی جوشقین بولمهیدی.
اوتگن ییللرده ینگی ییل و نوروز بیرهمی یولگه قوییلیشیدن ایکی هفته آلدین، مزارشریف شهریده تورلی برنامهلر جملهدن کنسرت، سپورت مسابقهلری و تفریحی برنامهلر یولگه قوییلردی و مملکت نینگ باشقه ولایتلرینی یشاوچیلری سیاحت اوچون بلخ ولایتی گه بارر ایدیلر.
بیراق، حاضر نوروز بیرهمی یولگه قوییلیشی اوچون یالغیز اوچ کون قالگن و مهمانلردن کوپینچهسی حاضرگهقدر مزارشریف شهری گه ییتیشمهگنلر و اوتگن ییللرگه قرشی بو شهرده مهمانلرنینگ حضوری آز کورینهدی.
بلخ یشاوچیلریدن بیرقطاری نینگ ایتیشیچه، نوروز بیرهمی ده اشتراک قیلیش اوچون مهمانلرنینگ حضوری کمهییشی گه مذکور ولایت نینگ ینگی پولیس قومندانی تانیشتیریلیشی خصوصیده بلخ نینگ سابق حاکمی عطامحمد نور و جمهورلیک ریاستی آرهسیده یوز بیرگن سونگی جنجللر سبب بولگن.
اولرنینگ ایتیشیچه، باشقه ولایتلردن بلخ گه کیلیش اوچون قصد قیلگن مهمانلردن بیرقطاری، مزارشریف شهری گه کیلیشدن وازکیچگنلر.
شونینگدیک، بلخ ولایت کینگشی باشلیغی محمدافضل حدید، مذکور ولایتده یوز بیرگن سونگی جنجللر نوروز بیرهمی یولگه قوییلیشی اوچون محلی حکومت برنامهلری اوستیگه سلبی تأثیر قویگنینی تَن آلهدی؛ بیراق ایتیشیچه، بو بیرهم اوتگن ییللردیک جوشقین شکلده یولگه قوییلهدی.
باشقه تاماندن، بلخ پولیس قومندانلیگینی سوزلاوچیسی عادلشاه عادل، مذکور ولایتده نوروز بیرهمی یولگه قوییلیشی و خوفسیزلیک جدی شکلده تأمینلنیشی توغریسیده اهالی گه ایشانچ بیرهدی.
عین حالده، بلخ ولایتی نینگ مدنیت و معلومات ریاستینی باشلیغی و نوروز بیرهمینی یولگه قویهدیگن کمیسیوننینگ مدنی کمیتهسینی مسؤولی صالحمحمد خلیق نینگ ایتیشیچه، مذکور ولایتده قویاش 1398- ییل نوروز بیرهمی کونلریده ایچکی خوانندهلر آرقهلی کنسرت، کتاب و قول صناعت کورگزمهلری، فوتبال، والیبال، کرکت و اوغلاق کبی سپورت مسابقهلری و داستان و شعر اوقیش فیستواللری یولگه قوییلهدی.
نوروز بیرهمی خصوصیده بولگن مراسم هر ییل مزارشریف شهریده جایلشگن حضرت علی زیارتگاهیده قویاش ییلینینگ بیرینچی کونیده جهنده کوتریلیب باشلنهدی.
