د ملي امنیت شورا ویاند جاوېد فیصل نن شنبه په کابل کې یوې خبري ناستې ته د خبرو پرمهال په کابل او ننګرهار کې د وروستیو خونړیو بریدونو ګوته طالبانو ته ونیوله او ویې ویل چې پر ملکي وګړيو او ماشومانو دغه خونړي بریدونه د طالبانو او د هغوی د ملګرو له لوري ترسره شوي دي.
په داسې حال کې چې طالبانو کابل او ننګرهار ولایتونو کې د تېرې اوونۍ په خونړیو بریدونو کې لاس لرل رد کړل او د امریکا د حکومت په استازیتوب زلمي خلیلزاد هم د یوه ویډويي کنفرانس له لارې خبریالانو ته ویلي د امریکا د موندنو له مخې طالبانو دغو بریدونو کې لاس نه درلود، بلکې دا بریدونه د داعش ډلې له لوري شوي؛ خو د ملي امنیت شورا ویاند د زلمي خلیلزاد وروستیو څرګندونو په اړه وویل، نه باید د طالبانو اعمالو ته براعت ورکړل شي او د هغوی په کړنو پرده واچول شي.
فیصل زیاته کړه افغان حکومت په ورستیو بریدونو کې د طالبانو د لاس لرلو په تړاو کافي اسناد لري او که چېرې امریکا داسې شواهد لري چې ښيي طالبانو د کابل او ننګرهار په بریدونو کې لاس نه درلود، نو افغان دولت ته دې وښيي.
له دې وړاندې د ولسمشر ویاند صدیق صدیقي هم په ټوېټر ویلي وو چې افغانستان کې د تاوتریخوالي اصلي عوامل طالبان دي او دا ډله په هېواد کې په بېلابېلو پلمو د ډېری بریدونو او تاوتریخوالي تر شا لاس لري.
فیصل زیاته کړه، طالبانو د روژې په درېیمه اوونۍ کې ۷۹ ملکي وګړي وژلي او ۲۱۸ نور یې ټپيان کړي چې دا د روژې میاشتې په دویمه اوونۍ کې د ملکي مرګژوبلې په پرتله ۳۰۰ سلنه لوړوالی ښيي.
د امنیت شورا ویاند په تېره اوونۍ کې طالبانو ته د اوښتنې مرګژوبلې په اړه هم معلومات ورکړل او ويې ویل، تېره یوه اوونۍ د افغان پوځ په تعرضي عملیاتو کې د دولت ۲۴۹ مخالفین وژل شوي او ۱۳۰ نور ژوبل شوي دي.
